Odinsovodagi qotillik. Hozirgacha nimalar ma’lum?

Timofey K.ning nishoni boshqa odam bo‘lgan bo‘lishi mumkin – bu «uni darslarni o‘zlashtirishdagi qoloqligi uchun tanbeh berib kelgan» o‘qituvchi, deb xabar berdi kuchishlatar tuzilmalarga yaqin bo‘lgan telegram-kanallar. Mash ma’lumotiga ko‘ra, bu Mariya Dmitriyevna K. bo‘lib, u Timofey K. o‘qigan sinfning matematika fani o‘qituvchisiga o‘rindosh sifatida dars o‘tgan. U boshlang‘ich sinflarga dars bergan, shuning uchun o‘smir uni kichik sinf o‘quvchilari o‘qiydigan joydan qidirgan. Videolardan birida Timofey o‘qituvchini qidirib, turli sinflarga bosh suqib ko‘rgani, ammo uning ismini va u rahbar bo‘lgan sinfni eslay olmasdan, uni ««rangi to‘qroq» deb ta’riflaganini ko‘rish mumkin. U baribir Mariya Dmitriyevnani topa olmaydi.

Timofeyning ustida ommaviy qotilliklarga ishora qiluvchi so‘zlar epikirovka bo‘lgan. Xususan, nimchasida «No lives matter» yozuvi tushirilgandi. Bu ommaviy qotilliklar ijrochilari hamda o‘ta o‘ngchi guruhlarga taqlid qilishga asoslangan submadaniyat belgisidir. Boshqa yozuvlar esa Anders Breyvik tomonidan sodir etilgan terakt, shuningdek AQSh va Yangi Zelandiyadagi maktablar va ibodatxonalarga qilingan hujumlarga ishora qilardi. Bundan tashqari, hujumdan oldin Timofey K. sinfdoshlariga o‘zining «manifesti»ni yuborgan, unda musulmonlar, yahudiylar, liberallar va so‘llarga qarshi fikr bildirib, barcha muammolarda ularni ayblagan.

Rossiya hukumati hozircha bu nafrat jinoyati bo‘lganini aytishga shoshilmayapti. Tergov qo‘mitasi o‘z bayonotida jinoyat motivi haqida to‘xtalmagan. RBK nashri manbasi tergov Timofeyning «ekstremistik harakatlar»ga aloqadorligini tekshirmoqda, ammo «shaxsiy adovat» motivini ham istisno etmayapti. Z-bloger Andrey Medvedev hujumni rus millatchiligi avj olishi va Rossiyadagi migrantlarga bosim bilan bog‘layotganlarni qoralagan. «Ruslar „noto‘g‘ri“ millatga mansubligi tufayli kimnidir so‘yishga oshiqadi, deb o‘ylash toza rusofobiya. O‘ldirilgan bola Qobiljonga bugun barcha normal ruslar motam tutishyapti... Ammo bu migratsiya sohasida davlat bundan keyin ham tartib o‘rnatishi kerakligini bekor qila olmaydi», – deya yozgan u.

Bu 2025 yilning o‘zida maktab o‘quvchisi tomonidan ksenofobik sabablarga ko‘ra sodir etilgan va jamoatchilikka ma’lum bo‘lgan ikkinchi qotillikdir. Birinchisi bahorda, Moskva yaqinidagi Nekrasovskiy qishlog‘ida sodir etilgandi. O‘shanda 14 yoshli o‘smir qirg‘izistonlik to‘qqiz yoshli bolani o‘ldirgan, tergov buni millatga nafrat asosidagi jinoyat deb topgandi. Ekstremizm tadqiqotchilaridan biri «Agenstvo» nashri bilan suhbatda anonim tarzda 2023 yildan beri mamlakatda nafratga asoslangan jinoyatlar soni keskin oshgani, jinoyatchilar esa yosharib borayotganini aytgan. Buni «Sova» markazining Rossiya Federatsiyasida «irqchilik zo‘ravonligi» avj olgani haqidagi ma’lumotlari ham tasdiqlaydi.