Ozarboyjonda Vardanyanga umrbod qamoq jazosi berish talab qilindi

Bokudagi harbiy sud prokurori Tog‘li Qorabog‘ning sobiq “hukumat rahbari” Ruben Vardanyanni umrbod ozodlikdan mahrum qilish jazosiga hukm etishni talab qildi. Bu haqda Ozarboyjonning Report nashri 18 dekabr, payshanba kuni xabar berdi.

Vardanyanga Ozarboyjon Jinoyat kodeksining qator moddalari bo‘yicha ayblovlar qo‘yilgan. Ular qatoriga terrorizmni moliyalashtirish, noqonuniy qurolli tuzilmalar tashkil etish, davlat chegarasini noqonuniy kesib o‘tish, qasddan odam o‘ldirish, hokimiyatni zo‘ravonlik bilan egallash, shuningdek qonunchilikda nazarda tutilmagan qurolli guruhlarni tashkil qilish kabi ayblovlar kiradi.

Vardanyanning oilasi 18 dekabr kuni uning bayonotini e’lon qildi. Unda Vardanyan Bokuda bo‘layotgan jarayonni to‘laqonli sud muhokamasi deb hisoblamasligi va uning ta’biri bilan aytganda, “adolatni taqlid qilish”da qatnashmoqchi emasligini bildirgan.

“Bokuda bo‘layotgan muhokama adolatli sudning eng asosiy standartlariga javob bermaydi, shuning uchun uni haqiqiy ma’nodagi sud deb hisoblab bo‘lmaydi. Men hech narsadan afsuslanmayman. Har bir ishimni ongli ravishda va o‘z ixtiyorim bilan qilganman, ehtimoliy oqibatlarni to‘liq tushungan holda. Men qilgan ishlarim uchun javob berishga tayyorman. Men afsuslanadigan yagona narsa — ko‘proq ish qila olmaganim. Yana bir bor aytaman: Arsax bor edi, bor va bo‘ladi — tarixni qayta yozish yoki voqealarga boshqacha talqinni tiqishtirishga urinishlardan qat’i nazar”, — deyiladi Vardanyan bayonotida.

Ruben Vardanyan ilgari “Troyka Dialog” investitsiya kompaniyasi egasi bo‘lgan, u “Skolkovo” biznes-maktabining hammuassislaridan biri hisoblanadi. Forbes jurnali versiyasiga ko‘ra, Vardanyan Rossiyaning eng boy odamlari ro‘yxatiga kirgan.

2022 yil sentabrida Vardanyan Rossiya fuqaroligidan voz kechgani va Tog‘li Qorabog‘ga ko‘chib o‘tganini ma’lum qilgan. 2022 yil noyabridan 2023 yil fevralgacha u tan olinmagan Tog‘li Qorabog‘ respublikasining “hukumati”ni boshqargan.

2023 yil 27 sentabrda Ozarboyjon chegara xizmati Vardanyanni Tog‘li Qorabog‘dan Armanistonga chiqib ketishga urinayotganda ushlagan. Shundan beri u Bokuda hibsda saqlanmoqda. U kamida ikki marta tergov hibsxonasida ochlik e’lon qilgan.

Ilgariroq Vardanyanni qo‘llab-quvvatlab Rossiyaning madaniyat, fan va ta’lim sohasidagi ayrim namoyandalari chiqish qilgan. Murojaatga yozuvchilar Aleksandr Arxangelskiy, Yevgeniy Vodolazkin va Alla Gerber, Moskva davlat universiteti iqtisod fakulteti dekani Aleksandr Auzan, Moskva “Skolkovo” boshqaruv maktabi direktorlar kengashi raisi Aleksandr Voloshin, kino tarixchisi Naum Kleyman, tadbirkor Mixail Kusnirovich, Pushkin nomidagi Davlat tasviriy san’at muzeyining sobiq direktori Marina Loshak, rejissyorlar Pavel Lungin va Aleksandr Sokurov hamda madaniy va akademik jamoaning boshqa vakillari imzo qo‘ygan.