Qoraqalpog‘istonda ikki mashina to‘qnashuvi oqibatida 3 kishi halok bo‘ldi

Kegeyli tumanida Labo quvib o‘tish qoidasini buzgan holda qarama-qarshi yo‘nalishda kelayotgan Damas bilan to‘qnashgan. YTH oqibatida 2 kishi voqea joyida, bir kishi shifoxonada vafot etgan. Respublikada yil boshidan buyon YTH qurbonlari soni 1848 kishiga yetdi.

Qoraqalpog‘istonda insonlar o‘limi bilan bog‘liq ayanchli YTH sodir bo‘ldi. Bu haqda Kun.uz manbasi xabar berdi.

Ma’lum bo‘lishicha, YTH 19 dekabr kuni soat 16:30 larda Kegeyli tumanining Qumshungil ovuli hududida, “Nukus-Chimboy-Taxtako‘pir” avtomobil yo‘lida sodir bo‘lgan. 1986 yilda tug‘ilgan A.S. Labo mashinasini “Nukus-Chimboy” yo‘nalishida boshqarib ketayotib, quvib o‘tish qoidasini buzgan holda qarama-qarshi yo‘nalishga chiqqan va 32 yoshli Z.J. boshqaruvidagi Damas bilan to‘qnashgan.

YTH oqibatida Labo haydovchisi A.S. hamda Damas yo‘lovchisi, 1962 yilda tug‘ilgan M.D. (ayol) voqea joyida halok bo‘lgan. Damas’ning yana bir yo‘lovchisi, 1962 yilda tug‘ilgan T.B. esa Kegeyli tumani tibbiyot birlashmasida vafot etgan.

Shuningdek, Labo mashinasida yo‘lovchi sifatida kelayotgan 27 yoshli A.Ye. o‘ng yelka suyagi yopiq sinishi tashxisi bilan shifoxonaga yotqizilgan.

Ma’lumotlarga ko‘ra, 19 dekabr kuni respublika bo‘yicha 7 kishi (Buxoro, Samanqand, Farg‘ona va Qashqadaryo viloyatlarida 1 kishidan, Qoraqalpog‘istonda 3 kishi) YTHlar oqibatida vafot etgan. Bu raqam dekabrning 19 kunida 130 kishiga, yil boshidan 19 dekabrga qadar esa 1848 kishiga yetgan.

Avvalroq Jizzaxda ikkita yuk mashinasi to‘qnashuvida bir kishi halok bo‘lgandi.

Tayyorlagan: Руслан Сабуров

#YTH #Kegeyli tumani