Ukraina armiyasi Kupyanskni qisman ozod etgan, ammo boshqa uchastkalarda vaziyat og‘irlashmoqda

Ukraina qurolli kuchlari Kupyanskning bir qismini ozod qilishga erishdi. Ahyon-ahyonda kichik shturmchi otryadlar qarshi hujumga o‘tib turgan Pokrovskdan farqli o‘laroq, Xarkiv oblasti sharqidagi bu shaharning g‘arbiy chekkasiiga Ukraina qurolli kuchlarining yirik guruhi tashlangan. Ular shahar janubi-g‘arbidagi «Yubileyniy» mikrorayonidagi ko‘p qavatli uylarga joylashgan (biroz oldin bu hudud shiddatli janglar maydoniga aylangan; Rossiya kuchlari mikrorayonning bir qismini nazorat qilib turgandi). Bu esa Volodimir Zelenskiyga shaharga janubi-g‘arbdan kirish qismiga kelib, selfi olish imkonini berdi. Bundan tashqari, ukrain kuchlari shahar markazidagi oldinroq tashlab ketilgan pozitsiyalar tomon siljishga muvaffaq bo‘lgan. Yanada muhimi, Ukraina qurolli kuchlari RF qurolli kuchlarining shahar shimolidagi mudofaa chizig‘iga chuqur kirib bordi. Bu esa Kupyansk ichkarisida qolgan rossiyalik shturmchilarga ta’minot yetkazib berish masalasini og‘irlashtiradi. Shu bilan birga, RF qurolli kuchlari Donetsk va Zaporijjya oblastlarida muvaffaqiyatli yurishlarini davom ettirmoqda. Ular Seversk shahrini egallagan va Ukraina qurolli kuchlarining Gulyaypoledagi pozitsiyalarini shturm qilmoqda. «Meduza» sharhida shu haqda.

Kupyansk

Rossiya qo‘shinlari so‘nggi bir yil ichida Kupyanskning har ikki qismini (shahar o‘rtasidan Oskol daryosi o‘tgan) egallashga bir necha bor urinib ko‘rdi. G‘arbiy sohildagi platsdarmdan hujum qilish orqali katta yutuqlarga erishildi. RF qurolli kuchlari markazdan o‘tib, shaharning janubiy chekkalarigacha yetib keldi. Shu bilan birga, shaharning janubi-g‘arbiy chekkasida va markaziy qismlarida Ukraina qurolli kuchlarining qarshilik o‘choqlari saqlanib qoldi. Bu vaqtda rus qo‘shinlari shaharning sharqiy qismida joylashgan sanoat zonasini egallashga muvaffaq bo‘ldi.

RF qurolli kuchlarining Oskol daryosi g‘arbiy sohilidagi platsdarmi doim og‘ir qurollarni yetkazib berish va qo‘shimcha kuchlar o‘tkazishsh bilan bog‘liq muammolarga duch kelgan: artilleriya va hatto dron operatorlari sharqiy qirg‘oqda turib harakat qilishiga to‘g‘ri kelgan. Natijada platsdarm qirg‘oq bo‘ylab tor uzun chiziq shaklini oldi. Ukraina qurolli kuchlari bir necha bor daryo bo‘yiga yorib kirishga va platsdarmni qismlarga bo‘lib tashlashga uringan.

Dekabr oyida Ukraina qurolli kuchlari tomonidan yana bir urinish amalga oshirildi. Ukraina bo‘linmalari Kupyanskning shimoliy chekkalarini egalladi va amalda shahar markazi va janubidagi rossiyalik shturmchilarni asosiy platsdarmdan uzib qo‘yishga muvaffaq bo‘ldi.

Shu bilan bir vaqtda, Ukraina qurolli kuchlari Kupyanskning janubi-g‘arbiy chekkasida «Yubileyniy» mikrorayonidagi ko‘p qavatli uylarga hujum qildi. Bundan tashqari, shahar markaziy maydonida ham ukrain shturmchilarini ko‘rishgan.

Bu yurishda Ukrainaning zaxira kuchlari, xususan, Milliy gvardiyaning oldin Xarkiv atrofida turgan va kuzda Kupyansk tomon olib kelingan «Xartiya» brigadas bo‘linmalari ishtirok etdi.

Qarshi hujum o‘tkazish uchun bu joy tanlanishi, katta ehtimol bilan, siyosiy sababga ega bo‘lgan: Volodimir Zelenskiy g‘arbga Vladimir Putin o‘z armiyasining muvaffaqiyatlari, xususan, Kupyansk egallangani haqida gapirganda yolg‘on ishlatganini ko‘rsatishi kerak edi.

E’lon qilingan videoga ko‘ra, Rossiya qo‘shini Kupyanskning markaziy qismidagi pozitsiyalarni ushlab turibdi. Shahardagi front chizig‘i qayerlardan o‘tgani haqida faqat shartli tarzda gapirish mumkin. Rossiyalik harbiylar Kupyanskning sharqiy qismida ham o‘rnashib olgan va ukrainlarning Oskolning sharqiy sohilidagi platsdarmlariga hujum qilmoqda, bu orqali Kupyansk-Uzlovoy va Borovoy kechuvlariga yetib kelish maqsad qilingan.

Shuningdek, RF qurolli kuchlari o‘zining g‘arbiy sohildagi platsdarmini Rossiyadan Dvurechanskoye orqali keluvchi yo‘lga bog‘lashga urinmoqda. Bu maqsadga erishilishi platsdarmga ta’minot yetkazishni osonlashtiradi va bu yerga zaxira kuchlarni olib kelib, Kupyanskka katta kuch bilan hujum qilish imkonini beradi.

Pokrovsk va Mirnograd

Pokrovsk yaqinidagi vaziyat Ukraina qurolli kuchlari uchun inqirozli holatida qolmoqda. Ukraina shturmchilari shaharning shimoliy chekkalari orqali shahar ichkarisiga kirib borayotganiga qaramay, RF qurolli kuchlari Pokrovskning deyarli barcha hududlarini nazorat qilmoqda. Qo‘shni Mirnogradda Ukrainaning sezilarli miqdordagi kuchlari qolib ketgan, ular amalda qurshov holatida jang qilishga majbur: Rossiya qurolli kuchlarining shturmchilari Pokrovsk va Rodinskoye o‘rtasidagi bo‘shliqqa (bu hudud orqali Mirnograd garnizoniga ta’minot yetkazilgan) joylashib olmoqda. Bundan tashqari, ilgari Ukraina qurolli kuchlari uchun muhim logistika punkti bo‘lgan Rovnoye qishlog‘i uchun ham janglar ketmoqda.

Sharqdan rossiyalik shturmchilar Mirnograd markaziga yorib kirgan, shuningdek, shaharga janubdan yaqinlashib kelmoqda.

Pokrovskdan shimoli-g‘arbda rus qo‘shinlari Ukraina qurolli kuchlarining ushbu yo‘nalishdagi asosiy frontorti bazasi bo‘lgan Grishino qishlog‘i chekkasiga hujumlarni davom ettirmoqda. Rossiya qurolli kuchlari qo‘mondonligi katta ehtimol bilan, bu yo‘nalishga zaxiralarni jalb qilgan: Ukraina harbiylari Grishinoga hujumda Sudja uchun jang tugagandan so‘ng frontdan olib chiqilgan 76-desant-shturm diviziyasi bo‘linmalari ham qatnashmoqda, deb hisoblamoqda. Bunga ishonchli dalillar yo‘q.

Gulyaypole va Gaychur daryosi bo‘ylab o‘tayotgan front chizig‘i

Kuz oxirida Ukraina qurolli kuchlari Gaychur daryosi orqali Gulyaypoledan Yanchur daryosining quyilish joyigacha bo‘lgan hudud bo‘ylab chekinishni boshladi. Katta ehtimol bilan, daryo qirg‘og‘i bo‘ylab mustahkam mudofaa tashkil etish rejalashtirilgandi, ammo buni amalga oshirishning iloji bo‘lmadi. RF qurolli kuchlari Gulyaypole shahri yaqinida Gaychurni ikki marta kesib o‘tdi.

Ukraina kuchlari (hududga tashlangan zaxiralar yordamida) shahar markazini ushlab turishda davom etmoqda, ammo ular uchun vaziyat yomonlashishda davom etmoqda.

Agar Rossiya qurolli kuchlari Gaychurni keng front bo‘ylab kesib o‘tadigan bo‘lsa (bir necha oy oldin Yanchur bilan bo‘lgani kabi), Ukraina qurolli kuchlarining Zaporijjya oblasti markazidagi asosiy «qal’asi» hisoblangan Orixiv shahrini sharqdan qurshab olish xavfi yuzaga keladi. Yoz va kuz davomida Ukraina qurolli kuchlari Rossiya armiyasining janub va g‘arbdan shaharga yaqinlashishga urinishlarini qaytargandi. Rossiya qurolli kuchlarining qudratli «Vostok» guruhi sharqdan hujumga o‘tsa, uni to‘xtatish qiyinroq bo‘ladi.