“Epshteyn fayllari”: Tramp moliyachining samolyotida 8 marta uchgan

AQSh Adliya vazirligi voyaga yetmaganlarni jinsiy ekspluatatsiya qilish va odam savdosida ayblangan moliyachi Jyeffri Epshteyn ishi bilan bog‘liq hujjatlarning yangi to‘plamini e’lon qildi.

“Epshteyn fayllari”ning yangi qismiga ko‘ra, AQSh prezidenti Donald Tramp 1990-yillarda Epshteynning xususiy samolyotida sakkiz marta uchgan, jumladan xotini va qizi bilan, shuningdek bir marta ismi aytilmagan 20 yoshli qiz bilan ham parvoz qilgan. Bu haqda The Wall Street Journal gazetasi xabar beradi.

Hujjatlar orasida jurnalistlar 2019 yilda Nyu-York qamoqxonasida Epshteyn vafot etishidan bir necha kun oldin yozilgani taxmin qilinayotgan xatni topgan. Xat muallifi prezident “yosh qizlarga bo‘lgan muhabbatni baham ko‘radi” va “yosh go‘zallarni yaxshi ko‘radi”, deb da’vo qiladi.

Bundan tashqari, NBC telekanali aniqlashicha, hujjatlar orasida 2020 yilgi prezident saylovlari arafasida Federal tergov byurosi (FBI)ga kelib tushgan anonim xabarlar ham bor. Anonimlardan biri 1990-yillarda Tramp va Epshteyn tomonidan zo‘rlanganini aytgan ayolni taniydi, deb da’vo qilgan. NBC qayd etishicha, FBI bu xabarni tergov qilgan-qilmagani noma’lum.

AQSh Adliya vazirligi allaqachon e’lon qilingan ba’zi hujjatlar “prezident Trampga nisbatan yolg‘on va sensatsion ayblovlarni o‘z ichiga oladi” va ular “hech qanday ishonchga ega emas”, deb bayonot bergan.

Donald Trampning o‘zi avvalroq Epshteyn bilan munosabatlarni u 2006 yilda ilk bor hibsga olinishidan oldin uzganini ta’kidlagan. Oq uy rahbari hozircha moliyachining xususiy samolyotidagi parvozlari haqidagi ma’lumotlar va o‘z manziliga qaratilgan yangi ayblovlarga izoh bermagan.

Noyabr oyi oxirida AQSh prezidenti Jyeffri Epshteyn ishi bo‘yicha barcha materiallarni e’lon qilishni Adliya vazirligiga zimmasiga yuklovchi qonunni imzoladi.

Materiallarning birinchi qismi 19 dekabr kuni e’lon qilindi — o‘shanda Adliya vazirligi 13 mingta tahrir qilingan faylni joylashtirgan. Ularning katta qismi yo avval ham e’lon qilingan, yoki “jabrlanuvchilarni himoya qilish” sababli keskin tarzda tahrirlangan edi. “Epshteyn fayllari”dagi fotosuratlarda Donald Trampdan tashqari sobiq shahzoda Endryu, xonandalar Mik Jagger va Maykl Jyekson, AQSh sobiq prezidenti Bill Klinton, Google hamasoschisi Sergey Brin, Microsoft asoschisi Bill Geyts, olim va publitsist Noam Xomskiy va yana ko‘plab taniqli shaxslarni ko‘rish mumkin.

AQSh Adliya vazirligi ta’kidlaganidek, bu suratlarda mashhurlarning uchrashi ular Epshteynning “xizmatlari”dan foydalangani yoki bolalarni jinsiy ekspluatatsiya qilishga jalb etilganini isbotlamaydi.

Materiallarning ikkinchi qismi Adliya vazirligi saytida 22 dekabr kuni paydo bo‘lgan, ammo bir necha soat o‘tib o‘chirib tashlangan. Idora “vazirlikning yopiq veb-saytiga ruxsatsiz kirilganini” ma’lum qildi. Tahrir qilingan materiallar 23 dekabr kuni qayta e’lon qilingan.

“Epshteyn fayllari”ni e’lon qilish Donald Trampning saylovoldi va’dalaridan biri bo‘lgan. Biroq prezident lavozimiga kirishgach, u ish materiallarini oshkor etishni cho‘zib kela boshladi. Tanqidchilar Oq uy rahbarini moliyachi bilan aloqalarini va ehtimol, uning noqonuniy faoliyatiga o‘zining daxldorligini yashirishga urinayotganlikda ayblaydi.

Tergov versiyasiga ko‘ra, Jyeffri Epshteyn odam savdosi (shu jumladan bolalarni ham) tarmog‘ini ularni jinsiy ekspluatatsiya qilish maqsadida tashkil etgan. Uning o‘zi ham voyaga yetmagan qizlardan foydalangan va ularni boshqa nufuzli odamlarga ham taqdim qilgan.

2008 yilda Epshteyn fohishabozlikni tashkil etish ishi bo‘yicha qo‘lga olingan va sudlangan. O‘shanda u tergov bilan kelishuvga borgan va qamoqda bor-yo‘g‘i 13 oy o‘tirgan. 2019 yilda Epshteyn yana odam savdosi ayblovi bilan qayta qo‘lga olingan. Shundan ko‘p o‘tmay, xabar qilinganidek, u Nyu-Yorkdagi qamoqxona kamerasida o‘z joniga qasd qilgan.

2025 yil sentabr oyida AQSh Demokratik partiyasi a’zolari o‘zlari ta’kidlashicha, Donald Tramp tomonidan imzolangan va 20 yildan ortiq vaqt oldin moliyachi Epshteynga yuborilgan tabrik otkritkasi suratini e’lon qilgan.

Otkritkada yalang‘och ayol tanasining shartli silueti tasvirlangan bo‘lib, ustiga “Jyeffri” va “Donald” o‘rtasidagi dialog bosib chiqarilgan. U quyidagi ibora bilan yakunlanadi: “Tug‘ilgan kuning bilan — har kuni yangi ajoyib sir bo‘lsin”.