Prezident: YaIM ilk bor 145 mlrd dollardan oshdi

Davlat rahbariga ko‘ra, to‘qqiz yil avval iqtisodiyot hajmini 100 mlrd dollarga yetkazish katta marra bo‘lib ko‘ringan. Ammo joriy yilda YaIM 145 mlrd dollardan oshib, bu xalqimiz va jamiyatning ulkan ishlarga qodir ekanini namoyon etmoqda.

Prezident global savdo tizimida «o‘yin qoidalari» o‘zgarayotgan, ishlab chiqarish hamda transport-logistika zanjirlari uzilayotgan, xomashyo va moliyaviy resurslar narxi oshib borayotgan sharoitda ham mamlakat iqtisodiyoti ishonchli o‘sishda davom etayotganini ta’kidladi.

Murojaatnomada joriy yilda iqtisodiyotga jalb qilingan xorijiy investitsiyalar hajmi 43,1 mlrd dollarga yetgani, umumiy investitsiyalarning YaIMdagi ulushi 31,9 foizni tashkil etgani qayd etildi. Davlat rahbarining ta’kidlashicha, bu ko‘rsatkichlar kelgusi yillarda ham yuqori sur’atlarda barqaror o‘sish uchun mustahkam zamin yaratadi.

Shuningdek, Prezident xalqaro reytinglarda O‘zbekistonning o‘rni mustahkamlanib borayotganini aytib, yetakchi reyting agentliklari suveren reytingni «BB-»dan «BB» pog‘onasiga oshirganini qayd etdi. 

Prezidentga ko‘ra, bunday o‘zgarish tashqi moliyalashtirish shartlarini yaxshilab, tashqi qarzga xizmat ko‘rsatish xarajatlarini pasaytirishga xizmat qiladi.

Raqamli transformatsiya natijalari ham alohida tilga olindi: Jahon bankining GovTech Maturity Index’i bo‘yicha O‘zbekiston 71 pog‘ona yuqori ko‘tarilib, top-10 mamlakat qatoriga kirgani aytildi. 

Infratuzilma yo‘nalishida ham 2025 yilda salmoqli ishlar amalga oshirilgani bildirildi. Xususan, energetikadagi o‘zgarishlar hisobiga elektr ishlab chiqarish hajmi 85 mlrd kVt/soatga yetkazilgani, ichimlik suvi va sug‘orish suvi ta’minotida ko‘plab mahallalar qamrab olingani qayd etildi. Uy-joy qurilishi bo‘yicha esa yil davomida ko‘p qavatli uylar topshirilishi, aholi va biznes tomonidan qo‘shimcha qurilish ishlari amalga oshirilgani ta’kidlandi.