Yer masalalari: 2026 yilda minglab mahallalarda xatlov o‘tkaziladi

“O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi qonun ijrosini ta’minlash maqsadida 2026 yil uchun xatlov ishlari ko‘lami belgilandi. 2 142 ta mahallada xatlov o‘tkazish bo‘yicha reja-jadval tasdiqlandi.

Ma’lum qilinishicha, xatlov ishlari qonun talablaridan kelib chiqqan holda, o‘zboshimchalik bilan egallangan yer uchastkalari hamda ularda qurilgan bino va inshootlar bo‘yicha holatni o‘rganish, ma’lumotlarni inventarizatsiya qilish va hujjatlashtirishga qaratilgan. Bu jarayon tegishli tartib-taomillar asosida amalga oshirilib, keyinchalik huquqiy maqomni belgilash va qonuniylashtirish masalalarini ko‘rib chiqish uchun asos bo‘lib xizmat qilishi qayd etilmoqda.

Reja-jadvalda 2026 yil davomida qaysi hududlar qamrab olinishi belgilab qo‘yilgan bo‘lib, xatlov ishlari mahallalar kesimida bosqichma-bosqich tashkil etilishi ko‘zda tutilgan. Tegishli xizmatlar tomonidan mahalliy darajada aholiga tushuntirish ishlari olib borilishi, ma’lumotlar yig‘ish va rasmiylashtirish jarayonlari belgilangan tartibda amalga oshirilishi kutilmoqda.

Kadastr agentligi tomonidan reja-jadval tasdiqlangani, xatlov natijalari asosida qonunchilikda nazarda tutilgan tartibda keyingi qarorlar qabul qilinishi mumkinligi ta’kidlandi.