Prezident topshirig‘i bilan 8 ming nafardan ortiq bolaga 500 dollarlik omonat hisobraqamlar ochildi

O‘zbekistonda 8 ming nafardan ortiq bolaga omonat depozit hisobraqamlari ochildi. Bu haqda Ijtimoiy himoya milliy agentligi xabar berdi.

Ma’lum qilinishicha, “Prezident archasi” tadbirlarida an’anaviy yangi yil sovg‘alariga qo‘shimcha ravishda, bolalar uchun omonat depozit hisobraqamlarini ochish to‘g‘risida qaror qabul qilingan. 17 yoshgacha bo‘lgan 8 ming nafardan ortiq yetim va ota-ona qaramog‘idan mahrum bo‘lgan bolalar uchun omonat depozit hisobraqamlari ochilgan.

Har bir bunday hisobraqamga davlat tomonidan 500 dollar miqdorida mablag‘ joylashtirilgan. Ushbu mablag‘lar yildan yilga kapitalizatsiya hisobiga jamg‘arib boriladi. Bola 18 yoshga to‘lgach, ushbu mablag‘lardan foydalanish imkoniyatiga ega bo‘ladi.

9 yoshdan yuqori bo‘lgan bolalar va ularning qonuniy vakillariga ijtimoiy kartalar berilgan. Bu qulaylik, xavfsizlik va shaffoflikni ta’minlash maqsadida amalga oshirilgan. Ijtimoiy kartalar orqali jamoat transportidan imtiyozli sharoitlarda foydalanish, xaridlar va xizmatlar uchun to‘lovlarni amalga oshirish, shaxsni tasdiqlash, shuningdek, ijtimoiy yordam va xizmatlarni olish huquqini tasdiqlash mumkin. Barcha operatsiyalarni Baraka mobil ilovasi orqali kuzatib va nazorat qilib borsa bo‘ladi.

Ushbu qo‘llab-quvvatlash davlat g‘amxo‘rligiga alohida muhtoj bo‘lgan bolalar uchun mo‘ljallangan:

• mahallalarda istiqomat qiluvchi yetim va ota-ona qaramog‘idan mahrum bo‘lgan bolalar;
• mehribonlik uylari, oilaviy va kichik hajmli bolalar uylari hamda SOS bolalar qishloqlari tarbiyalanuvchilari;
• ota-onalari vatan sarhadlarini himoya qilish chog‘ida halok bo‘lgan bolalar;
• “Taskin” bolalar hospisi huzuridagi bolalar onkologiya shifoxonasida davolanayotgan bolalar.

“Taskin” bolalar hospisida davolanayotgan bolalar uchun alohida tartib ham belgilangan. Ya’ni depozit hisobraqamidagi mablag‘lar zaruratga ko‘ra va qonuniy vakillar murojaati asosida istalgan vaqtda bank kartasiga o‘tkazilishi mumkin bo‘ladi.