Asosiy oziq-ovqat mahsulotlariga nisbatan bojxona bojining nol stavkasini qo‘llash muddati uzaytirildi

«Aholining alohida turdagi iste’mol mahsulotlariga bo‘lgan ehtiyojlarini kafolatli ta’minlashga hamda iqtisodiyotning ayrim tarmoqlarini yanada qo‘llab-quvvatlashga doir qo‘shimcha chora-tadbirlar to‘g‘risida»gi prezident farmoni qabul qilindi.

Farmonga ko‘ra, import qilinadigan asosiy oziq-ovqat mahsulotlariga nisbatan bojxona bojining nol stavkasini qo‘llash muddati 2027 yilning 1 yanvariga qadar uzaytirildi.

Ro‘yxatda qoramol va qo‘y go‘shti, baliq, shakar, sariyog‘ va sutdan tayyorlangan boshqa moylar va yog‘lar, parranda tuxumlari, banan, sitrus mevalari (limondan tashqari), qahva, choy, hayvon va o‘simlik yog‘lari va moylari, margarin, xamirturush, bug‘doy uni, yogurt, pishloq va tvoroglar, piyoz, sarimsoqpiyoz, quritilgan xurmo, olma, nok, behi, un, tayyor yoki konservalangan go‘sht mahsulotlari, murabbo, mevali jyele, marmelad, konservalangan mevalar, yong‘oqlar, souslar, mineral va gazlangan suvlar, bolalar kiyimi, poyabzal va boshqa ko‘plab mahsulotlar bor.

Farmon ichki iste’mol bozoridagi ijtimoiy ahamiyatga ega tovarlar narxi oshishining oldini olish, tarif va notarif tartibga solish vositalarini keng qo‘llash hisobiga ularning inflatsiya darajasiga salbiy ta’sirini yumshatish maqsadida qabul qilingani ta’kidlangan.