2025 yilda palov indeksi qanday o‘zgardi?

Milliy statistika qo‘mitasi 2025 yil dekabr oyida 1 kg palov tayyorlash uchun kerak bo‘ladigan masalliqlar qiymati haqida ma’lumot berdi.

Unga ko‘ra, Toshkent shahrida 1 kg palov tayyorlash uchun 115 491 so‘mlik bozorlik qilish kerak. Farg‘onada ham masalliqlar qiymati deyarli shuncha: 114 890 so‘m.

Qoraqalpog‘istonda esa 1 kilo osh damlash eng arzon – 97 727 so‘mga tushadi.

Bu narxlar 8 ta mahsulotni o‘z ichiga oladi: 0,7 kg mol go‘shti, 1 kg lazer guruch, 0,3 l kungaboqar yog‘i, 1 kg sabzi, 300 g piyoz, 100 g no‘xat, 10 g zira va 20 g osh tuzi.

Statistika qo‘mitasi bir necha yil davomida osh markazlaridagi 1 kg tayyor palov narxini e’lon qilib borayotgan edi. 2025 yil fevraldan boshlab, “palov indeksi” o‘zgardi va 1 kg osh pishirish uchun kerak bo‘ladigan masalliqlar narxini hisoblashga o‘tildi.

Shundan kelib chiqib, Kun.uz so‘nggi 11 oy davomida palov indeksi qanday o‘zgarganiga e’tibor qaratdi.

Ma’lum bo‘lishicha, 2025 yil fevral–dekabr oylarida osh uchun masalliqlar narxi Toshkent shahri, Qashqadaryo, Surxondaryo va Farg‘ona viloyatlarida 11 foizga ko‘tarilgan.

Andijon, Buxoro, Sirdaryo va Toshkent viloyatlari hamda Qoraqalpog‘iston Respublikasida “palov inflatsiyasi” 9 foizni tashkil etgan.

Ma’lumot uchun, Statqo‘mning inflatsiya hisobotida keltirilishicha, 2025 yilda suyaksiz mol go‘shti 25 foizga, suyakli mol go‘shti 24 foizga qimmatlashgan.