So‘rov: Nemislar AQShning Venesueladagi harbiy operatsiyasini ma’qullamadi

Shu tariqa, Germaniyada so‘rovda ishtirok etganlarning har o‘n nafaridan yettitasi (72 foiz) AQShning Janubiy Amerikadagi bu mamlakatga harbiy aralashuvini asossiz, deb hisoblaydi. Respondentlarning har o‘n nafaridan sakkiz nafari (82 foiz) esa jahon siyosatida “kuchli haq” tamoyilining kuchayishi ularni xavotirga solayotganini aytgan. Shu bilan birga, so‘rov ishtirokchilarining atigi 39 foizi Germaniyaning AQSh harakatlariga nisbatan “AQSh prezidenti Donald Trampni qo‘zg‘atib yubormaslik uchun” ehtiyotkorona ommaviy munosabat bildirgani o‘zini oqlaydi, deb hisoblaydi.

So‘rovda qatnashganlarning aniq yarmi, aksincha, Germaniya va Yevropa Ittifoqi AQShni ochiq va qat’iy tanqid qilishi tarafdori — hatto bu Tramp bilan munosabatlarni murakkablashtirishi mumkin bo‘lsa ham.

Harbiy operatsiya nemis jamiyatida AQSh haqidagi tasavvurni yaxshilamadi. Germaniya aholisining faqat 15 foizi AQShni o‘z mamlakati uchun ishonchli hamkor, deb biladi — bu Deutschlandtrend so‘rovlari tarixidagi eng past ko‘rsatkich. Taqqoslash uchun: hozir Fransiyani ishonchli hamkor, deb hisoblovchilar 78 foiz, Buyuk Britaniyani — 74 foiz.

Ukrainani ishonchli hamkor, deb biluvchilar 40 foizni tashkil etsa, 48 foiz Ukrainaga ishonib bo‘lmaydi, deb hisoblaydi. Respondentlarning atigi 9 foizi Rossiyani ishonchli hamkor, deb hisoblaydi, 83 foiz esa uni ishonchsiz, deb baholaydi.

So‘rovda ishtirok etganlarning faqat har sakkizinchisi Tramp faoliyatini ijobiy baholaydi — bu hatto uning ikkinchi prezidentlik muddati boshlangan davrdagi darajadan ham past. Shu bilan birga, nemislarning Germaniya—AQSh munosabatlari ahvoli va AQShning NATO doirasida xavfsizlik kafolatchisi sifatidagi roli borasidagi xavotiri yuqori darajada qolmoqda.

Ayni paytda Germaniya fuqarolarining yarmidan ko‘prog‘i NATOga kamroq bog‘liq bo‘lgan Yevropa harbiy ittifoqini shakllantirish g‘oyasini barqaror qo‘llab-quvvatlamoqda. Bu pozitsiya barcha siyosiy partiyalar tarafdorlari orasida keng tarqalgan.

Xalqaro vaziyatning beqarorligi Germaniyada hokimiyatdagi “qora-qizil” koalitsiyaga bosimni kuchaytirayotgani qayd etilgan. Bu koalitsiya tarkibiga Xristian-demokratik ittifoq (XDI) va Xristian-sotsial ittifoq (XSI) bloki, shuningdek Germaniya Sotsial-demokratik partiyasi (GSDP) kiradi. Saylovchilarning taxminan 84 foizi ichki siyosiy vaziyatni xavotirli, deb hisoblaydi. So‘rovda qatnashganlarning faqat har beshinchisi mamlakat hukumati ishidan mamnunligini bildirgan.

Iqtisodiy holatga berilgan baholar pastligicha qolmoqda, migratsiya siyosatiga oid masalalar esa o‘tgan yilga nisbatan xavotir biroz kamayganiga qaramay, hali ham sezilarli ishonchsizlik uyg‘otmoqda. Respondentlarning taxminan yarmi hukmron koalitsiya yaqin bir yil ichida saqlanib qolishi mumkin, deb hisoblasa, deyarli shuncha kishi uning parchalanishini kutayotganini aytgan.

Agar Bundestag saylovlari kelasi yakshanba o‘tkazilsa, ovoz berish natijalarida katta o‘zgarish qayd etilmagan. XDI/XSI bloki 28 foiz ovoz olar edi, GSDP — 13 foiz, o‘ta o‘ng “Germaniya uchun muqobil” (AfD) — 25 foiz. “Ittifoq-90/yashillar” partiyasi va So‘l partiya ko‘rsatkichlarini mos ravishda 12 foiz va 10 foiz darajasida saqlab qolgan. Qolganlari, jumladan “Sara Vagenknext ittifoqi” va Erkin demokratik partiya (FDP) 5 foizlik to‘siqdan o‘ta olmas edi.