London Kiyev uchun Nightfall ballistik raketasini ishlab chiqadi

Buyuk Britaniya Ukraina uchun yangi taktik ballistik raketalar ishlab chiqadi — ular Rossiya hujumiga uchragan mamlakatning o‘t ochish qudratini oshiradi hamda unga “Putinning harbiy mashinasidan o‘zini himoya qilish”ga yordam beradi. Shunday bayonot Buyuk Britaniya hukumati tomonidan yakshanba, 11 yanvar kuni e’lon qilindi.

Bayonotdan kelib chiqishicha, Nightfall deb nomlangan loyiha doirasida yaratiladigan bu raketalar 200 kg og‘irlikdagi yadrosiz jangovar qismni olib yura oladi va 500 kmgacha masofadagi nishonlarga zarba bera oladi.

“Loyihaning maqsadi — innovatsiyalar, o‘sish va 2026 yilda Ukrainaga yordamni kuchaytirishni qo‘llab-quvvatlagan holda, Buyuk Britaniyaning mudofaa sanoati rivojini rag‘batlantirish”, — deyiladi London bayonotida.

Qayd etilishicha, Nightfall raketalarini turli transport vositalaridan ishga tushirish mumkin bo‘ladi; shuningdek, qisqa vaqt ichida bir necha raketani tezda uchirib, bir necha daqiqada joyni tark etish imkoniyati ham bo‘ladi. Buyuk Britaniya hisobicha, bu Ukrainaga Rossiya qo‘shinlari javob qaytarishga ulgurmasidan oldin RFdagi muhim harbiy nishonlarga zarba berish imkonini yaratadi.

Bir raketa uchun maksimal narx 800 000 funt sterlingdan oshmasligi kerak (922 000 yevro). London oyiga 10 ta shunday tizim ishlab chiqarishni rejalashtirmoqda.

Buyuk Britaniya hukumati tenderda g‘olib chiqqan uchta sanoat jamoasiga har biri uchun 9 mln funt (10,4 mln yevro) hajmidagi shartnoma ajratib, ilk uchta raketani ishlab chiqish va yetkazib berishni ko‘zlamoqda. Ular sinov parvozlari uchun mo‘ljallangan bo‘lib, 12 oy ichida o‘tkazilishi kerak.