Navoiyda yana avtobus ag‘darildi

Navoiy viloyati Tomdi tumanida yo‘lovchi avtobus ag‘darilib ketdi, deya xabar bermoqda viloyat YHXB.

Voqea 17 yanvar kuni soat 07:00 atrofida tumanning «Tomdibuloq» OFY hududidan o‘tgan A-379 Navoiy-Uchquduq xalqaro avtomobil yo‘lining 189–190 kilometrlari oralig‘ida sodir bo‘lgan.

Zhong Tong avtobusi haydovchisi Navoiy-Zarafshon yo‘nalishi bo‘ylab harakatlanib kelib boshqaruvni yo‘qotgan. Oqibatda transport qarama-qarshi tomonga ag‘darilib ketgan.

Hodisa tufayli jabrlangan ikki kishi Zarafshon shahar tibbiyot bo‘limiga yetkazilgan. Avtobusda jami qancha odam bo‘lganiga oydinlik kiritilmagan.

Hozirda holat yuzasidan Jinoyat kodeksining 266-moddasi 1-qismi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari olib borilmoqda.

Eslatib o‘tamiz, 5 yanvar kuni ham Navoiy viloyatining Tomdi tumani hududida 47 nafar yo‘lovchisi bo‘lgan avtobus ag‘darilib ketishi oqibatida ikki kishi voqea joyida halok bo‘lgan, 9 kishi shifoxonaga yotqizilgandi.