Uzbekistan Airways samolyoti dvigateli ishlamay qolgani sababli Krasnoyarskka favqulodda qo‘ndi

Uzbekistan Airways aviakompaniyasining Boeing 767 samolyoti 21 yanvar kuni Toshkent - Vladivostok yo‘nalishi bo‘yicha uchib borayotganida favqulodda hodisa yuz berdi.

Ekipaj birinchi dvigatelning ishlamay qolishi sababli Rossiyaning Krasnoyarsk shahri aeroportiga favqulodda qo‘ndi. Qo‘nish mahalliy vaqt bilan soat 14:46 da muvaffaqiyatli amalga oshirildi. Samolyot bortida 101 nafar yo‘lovchi, 5 nafar ekipaj a’zosi va 16 nafar bort kuzatuvchisi bo‘lgan. Qo‘nish chog‘ida aeroportning barcha xizmatlari to‘liq shay holatga keltirildi va xavfsizlik qoidalariga muvofiq choralar ko‘rildi.

Qo‘nishdan so‘ng yo‘lovchilar chegara va bojxona nazoratidan o‘tkazildi va Rossiya Federal aviatsiya qoidalariga muvofiq xizmat ko‘rsatiladigan terminalning umumiy hududiga joylashtirildi. Samolyot texnik ko‘rikdan o‘tkazilgunga qadar parvozlardan chetlatildi.

Uzbekistan Airways Vladivostokka parvozni davom ettirish uchun zaxira samolyotini yuboradigan bo‘ldi. Yo‘lovchilar 22 yanvar kuni manzilga yetkazilishi kutilmoqda.