Andijon viloyati hokimining sobiq o‘rinbosari Botirjon Hamroyev ozodlikka chiqdi. Apellsiya sudi 7 yil muddatga ozodlikdan mahrum qilingan sobiq “zamhokim”ga tayinlangan jazoni zarar qoplangani uchun o‘zgartirdi.
Kun.uz tanishgan sud ajrimida keltirilishicha, Botirjon Hamroyev bilan bog‘liq jinoyat ishi doirasida qariyb 30 kishi sudlangan. Ularning bir nechtasi Andijon viloyatidagi turli MChJlar vakillari bo‘lsa, aksariyati “Agrobank” ATB Andijon viloyat boshqarmasi mansabdorlari hisoblanadi.
Sud hukmiga ko‘ra, hududdagi MChJlardan birining ta’sischisi “Agrobank” ATB tomonidan issiqxonalar barpo etish uchun ajratilishi belgilangan imtiyozli kreditdan foydalanish bilan bog‘liq munosabatlarni to‘liq qo‘lga kiritish orqali daromad orttirishni rejalashtirgan. U buning uchun Andijon viloyat hokimligi va “Agrobank” ATB Andijon viloyati boshqarmasi mansabdor shaxslarini issiqxona komplekslarini mahalliylashtirgani, har qanday miqdorda yetkazib berishi mumkinligiga ishontirgan. Shundan so‘ng uyushgan guruh a’zolari o‘rtasida vazifalar taqsimlangan. Botirjon Hamroyev ham ushbu uyushgan guruh a’zosi bo‘lgani keltirilgan.
Sud hujjatida qayd etilishicha, Botirjon Hamroyev mahalliy hokimlik idorasi mansabdor shaxsi sifatida ajratilayotgan imtiyozli kredit mablag‘larini faqatgina muayyan jamiyatga yo‘naltirish hamda kredit ajratilishini jadallashtirish borasida “Agrobank” ATB Andijon viloyati boshqarmasi mansabdor shaxslariga ko‘rsatmalar berib borgan.
JIB Yunusobod tuman sudining 2025 yil 8 iyuldagi hukmi bilan Botirjon Hamroyev 7 ta epizod bo‘yicha oqlangan. U Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a,v” bandlari bilan aybli deb topilgan hamda 3 yil mahalliy hokimiyat organlari tizimida ishlash huquqidan mahrum qilingan holda 7 yil ozodlikdan mahrum qilish jazosiga tortilgan.
Toshkent shahar sudi axborot xizatining ma’lum qilishicha, JIB Yunusobod tuman sudi tomonidan mansab vakolatini suiiste’mol qilish, o‘zganing mulkini o‘zlashtirish yoki rastrata qilish yo‘li bilan talon-toroj qilish va boshqa jinoyatlarni sodir etganlikda ayblangan jami 29 nafar sudlanuvchiga oid jinoyat ishi ko‘rilib, sudning 2025 yil 8 iyuldagi hukmi bilan tegishli jazolar tayinlangan.
Sud hukmiga nisbatan tuman prokurorning protesti va sudlanuvchilarning shikoyatlariga asosan jinoyat ishi Toshkent shahar sudi apelletsiyasi instansiyasida ko‘rilib, hukmning 24 nafar sudlanuvchiga tegishli qismlari o‘zgartirilgan.
