Estoniya TIV rahbari Shryoderning Rossiya haqidagi gaplarini tanqid qildi

Estoniya tashqi ishlar vaziri Margus Tsaxkna Germaniyaning sobiq kansleri Gerxard Shryoderni tanqid qildi. Shryoder “Rossiyani abadiy dushman sifatida demonizatsiya qilish”ga qarshi chiqib, RFdan “arzon energiya tashuvchilar” yetkazib berishni qayta yo‘lga qo‘yishni qo‘llab-quvvatlagan. Tsaxkna yakshanba, 25 yanvar kuni X ijtimoiy tarmog‘ida shunday deb yozdi: “Ikkinchi jahon urushi tugaganidan beri Yevropadagi eng shafqatsiz urushni olib borayotgan mamlakatni ‘demonizatsiya qilmaslik’ka chaqirishlar va hatto energetik hamkorlikni qayta tiklashga ishoralar — bu shunchaki dahshatli”.

Uning fikricha, Ukrainadagi urush “ko‘p yillik yumshatish siyosati va savdo tajovuzni jilovlaydi, degan o‘n yillar davomidagi ishonchning to‘g‘ridan to‘g‘ri natijasi” bo‘lgan. “Bu ishonch qayta qurollanishni moliyalashtirdi va Yevropada agressorning pul oqimini ta’minlab turgan energetik qaramlikni mustahkamlab qo‘ydi”, — deb hisoblaydi Tsaxkna. U Germaniya tashqi siyosatining Wandel durch Handel (“Savdo orqali o‘zgarishlar”) tamoyiliga asoslangan yo‘nalishini “omadsiz” va “ortga qaytmas tarzda o‘tmishda qolgan” deb atadi.

23 yanvar kuni Berliner Zeitung gazetasida e’lon qilingan maqolada sobiq kansler, jumladan, Ukrainadagi urushni “xalqaro huquqni buzish, inson huquqlarini buzish” deb atagan. Shu bilan birga, u “Rossiyani abadiy dushman sifatida demonizatsiya qilish”ga qarshi chiqqan. “Rossiya — varvarlar mamlakati emas, boy madaniyatga ega va Germaniya bilan turli tarixiy aloqalari bo‘lgan mamlakat”, — degan Shryoder.

Siyosatchi Germaniya kansleri lavozimida bo‘lgan davrida ilgari surgan Rossiya bilan yaqinlashuv siyosatini to‘g‘ri, deb hisoblashini ta’kidlagan. Uning so‘zlariga ko‘ra, Germaniyaga Rossiyadan “arzon energiya tashuvchilarning xavfsiz va ishonchli importi” zarur.

Shryoder, shuningdek, Yevroittifoq xalqaro ahamiyatini yo‘qotayotgani sabablaridan biri sifatida Vashington va Moskva Bryusselni chetlab o‘tib Ukrainaning kelajagi haqida kelishib olayotganini qayd etgan. Siyosatchi Donald Tramp prezidentligi falokatli oqibatlarga olib kelishi mumkin, deb hisoblaydi, chunki u nafaqat “Grenlandiyani o‘zlashtirib olish”ga urinmoqda, balki “YeIni AQShga yangi qaramlikka kiritmoqchi”.

Gerxard Shryoder 1998 yildan 2005 yilgacha Germaniya kansleri lavozimida ishlagan. Iste’fodan keyin u bir necha bor Rossiya bilan bog‘liq loyihalarda ishtirok etgan. Siyosatchi “Shimoliy oqim” (Nord Stream) loyihasi operatori bo‘lgan kompaniyaning direktorlar kengashiga, shuningdek, “Rosneft”ning direktorlar kengashiga rahbarlik qilgan. Shryoder Vladimir Putinga yaqin do‘st hisoblanadi.

RF Ukrainaga keng ko‘lamli hujumni boshlaganidan keyin, siyosatchi Kreml bilan yaqin aloqalari sabab tanqid ostida qolgan va sobiq kansler sifatida foydalanib kelgan ayrim imtiyozlaridan mahrum etilgan. Shryoder 2022 yil boshida uni “Gazprom” direktorlar kengashiga kiritish taklifini rad etgan, shuningdek 2017 yildan beri egallab kelgan “Rosneft” direktorlar kengashi raisi lavozimini ham tark etgan.