Ijtimoiy tarmoqlar va bolalar: Qozog‘istonda cheklovlar ko‘rib chiqilmoqda

Qozog‘iston ta’lim vaziri Juldiz Suleymenova deputatlarning bolalar va o‘smirlar uchun ijtimoiy tarmoqlarga kirishni cheklash taklifiga munosabat bildirdi. U tafsilotlarni hukumatdagi brifingda aytib o‘tdi, deb xabar qiladi Tengrinews.kz.

Jurnalistlar amaldordan bolalarning ijtimoiy tarmoqlarga kirishi aynan qanday cheklanishi rejalashtirilayotganini so‘rashdi. Juldiz Suleymenovaning aytishicha, vazirlik bu masalani o‘rganmoqda.

“Hozir cheklovlarni ko‘rib chiqyapmiz — bir nechta takliflar bor. Vazirlikda ishchi guruh tuzildi. Biz bolalarni huquqqa xilof kontentdan himoya qilmoqchimiz, bu ko‘pgina mamlakatlarda qo‘llanadi. Masala ochiq va jamoatchilik bilan muhokama qilinadi, jumladan ota-onalar, pedagoglar va OAV bilan ham”, — dedi Suleymenova.

Vazir, shuningdek, vazirlik qanday choralarni ko‘rib chiqayotganini sanab o‘tdi:

• bolalar uchun SIM-kartalarni ro‘yxatdan o‘tkazish — kirishni nazorat qilish uchun birinchi qadam;
• 14 yoshgacha bo‘lgan bolalar foydalanadigan kontentni monitoring qilish — huquqqa xilof materiallarni ko‘rish va bloklash uchun;
• maktablarda mediasavodxonlikni o‘qitish — bolalarga internet va ijtimoiy tarmoqlardan xavfsiz foydalanishni tushuntirish uchun.

“Bolalarga ijtimoiy tarmoqlarni cheklash masalasini media jamoasi va ota-onalar bilan muhokama qilish kerak bo‘ladi. Ishchi guruh allaqachon tuzilgan, uning majlisini keyin batafsil ma’lum qilamiz”, — deya qo‘shimcha qildi u.

Juldiz Suleymenova tashabbus hozircha muhokama bosqichida ekanini, yakuniy qarorlar hali qabul qilinmaganini ta’kidladi.

Dekabr oyida Qozog‘istonda 16 yoshdan kichik foydalanuvchilarning onlayn-platformalarda ro‘yxatdan o‘tishiga taqiq joriy etuvchi qonun loyihasi tayyorlangan edi. Hujjatni Madaniyat va axborot vazirligi ishlab chiqqan. Keyinroq vazirlikda “taqiq bolalarni faqat ijtimoiy tarmoqlarda ro‘yxatdan o‘tkazishga tatbiq etiladi”, deb aniqlik kiritildi.