Samarqandda yollanma qotil orqali tanishini o‘ldirmoqchi bo‘lgan shaxslar qo‘lga olindi

24 yoshli erkak Toshkent shahrida yashovchi tanishini o‘rtalarida kelib chiqqan nizo sababli o‘ldirishni maqsad qilgan va yollanma qotil izlagan. U tadbirga jalb qilingan shartli yollanma qotilga bu ish uchun 2 200 dollar berishni va’da qilgan.

Foto: Videodan kadr

Samarqandda yollanma qotillik jinoyatining oldi olindi. Bu haqda viloyat IIB axborot xizmati xabar berdi.

Ma’lum qilinishicha, 2002 yilda tug‘ilgan erkak Toshkent shahrida yashovchi tanishini o‘ldirish maqsadida yollanma qotil izlayotgani haqida tezkor ma’lumot olingan. Shundan so‘ng DXX Samarqand viloyati boshqarmasi, viloyat IIB va prokuraturasi xodimlari hamkorligida tezkor tadbir o‘tkazishga kirishilgan.

Tezkor tadbirga shartli yollanma qotil jalb etilgan. 24 yoshli buyurtmachi shartli yollanma qotilga o‘zi bilan kelishmovchiligi bo‘lgan shaxsni o‘ldirishni buyurib, buning evaziga 2 200 dollar berishni va’da qilgan. 27 yanvar kuni Samarqand shahrida o‘tkazilgan tezkor tadbirda buyurtmachi erkak shartli yollanma qotildan grimmlangan murda fotosuratini qabul qilib, unga 2 000 dollar bergan vaqtida ashyoviy dalillar bilan ushlangan.

Olib borilgan tezkor surishtiruv harakatlari davomida qo‘lga olingan shaxsga o‘zi ishlab kelayotgan MChJning 30 yoshli rahbari Toshkent shahrida yashovchi qarindoshi bilan oldindan mavjud bo‘lgan nizolari hamda katta miqdordagi qarzi sababli qotil yollashga buyurtma bergani aniqlangan. Mazkur shaxs ham qo‘lga olingan.

Hozirda holat yuzasidan Jinoyat kodeksining 25,97-moddasi (qasddan odam o‘ldirishga suiqasd qilish) 2-qismi qismi bilan jinoyat ishi qo‘zg‘atilgan.