Germaniyada jamoat transportida ish tashlashlar kutilmoqda

Nemis jamoat xizmatlari sohasi xodimlari kasaba uyushmasi Ver.di 2 fevral kuni butun Germaniya bo‘ylab jamoat transportida ish tashlashlarga chaqirdi. Kasaba uyushmasi juma kuni, 30 yanvarda bildirishicha, ish tashlash ishtirokchilari navbatdagi muzokaralar raundida ish beruvchilarga bosim o‘tkazmoqchi, muzokaralar natijasi 150 ta shahar transport va avtobus kompaniyasidagi qariyb 100 000 nafar xodimga daxl qiladi.

AFP axborot agentligi eslatishicha, muzokaralar asosan Munitsipal ish beruvchilarning umumnemis birlashmasi (KAV) bilan 2025 yil noyabr oyidan buyon Germaniyaning barcha 16 federal yerida olib borilmoqda.

Ver.di munitsipal transport sohasida ish shartlarini sezilarli yaxshilashni talab qilmoqda. Gap, xususan: haftalik ish yuklamasi va smenalar davomiyligini qisqartirish, dam olish (hordiq) vaqtini ko‘paytirish, tungi vaqtda va dam olish kunlari ishlaganlik uchun qo‘shimcha to‘lovlarni oshirish kabi choralar haqida ketmoqda.

Bundan tashqari, Bavariya, Brandenburg, Saar, Tyuringiya yerlarida hamda Hamburgdagi yerusti temiryo‘li operatori Hamburger Hochbahn kompaniyasi bilan ish haqini oshirish bo‘yicha qo‘shimcha muzokaralar ham olib borilmoqda.

Ver.di ma’lumotlariga ko‘ra, muzokaralar davomida ish beruvchilar deyarli barcha yo‘nalishlarda yon berishdan bosh tortmoqda.

Kasaba uyushmasi Germaniyaning 16 federal yeridan 15 tasida — Quyi Saksoniyadan tashqari — ish tashlashlarga chaqirdi.

Shu bilan birga, Deutsche Bahn temiryo‘l operatori allaqachon bu aksiyalar unga taalluqli emasligini ma’lum qilgan. Berlin va Myunxenni o‘z ichiga olgan yirik shaharlardagi shahar atrofi poyezdlari ham, kutilganidek, qatnovni davom ettiradi, chunki Ver.di ularning xodimlari manfaatini himoya qilmaydi.