Oxirgi vaqtlarda Jyefri Epshteyn degan odam haqida ko‘p eshitayotgan bo‘lsangiz kerak. Pedofillikda ayblanib qamalgan bu millioner yetti yil avval Amerika qamoqxonasida o‘lgan. Lekin oxirgi vaqtlarda u Amerikaning «qora qutisi» o‘laroq juda ko‘p mashhur insonlarni jinsiy zo‘ravonlik girdobiga tortmoqda...
Kim bu monstr?
Qisqacha Jyefri Epshteyn kim ekani haqida. 1953 yil Bruklindagi yahudiylar oilasida tug‘ilgan Jyefri bir muddat o‘qituvchilik qilib ko‘radi, biroq maktabdan haydalgach moliya, bank tizimida ishlashga qaror qiladi. Moliyachilikda ham nimanidir qoyillatgani aniq emas, lekin Amerikaga tegishli Virjiniya orollarida shaxsiy orol sotib olish uchun yetarli pul topa olgan. Bu orolning nomi ham bor, lekin uni Epshteyn oroli deb atashadi.
Epshteyn bu oroldagi hashamatli villasida fohishabozlik bilan, xususan, voyaga yetmagan qizlarni jinsiy zo‘rlash bilan shug‘ullanib kelgan. Bugun butun Amerikani oyoqqa turg‘izgan Epshteyn o‘zi avragan qizlarga pul bergan, qimmat sovg‘alar bilan aldagan, o‘qishi uchun pul to‘lagan. Va ularga yosh dugonalarini villaga kelishga ko‘ndirish evaziga pul taklif qilgan. Shu tariqa o‘ziga xos fohishabozlik piramidasini yaratgan.
Epshteyn villasiga olib borgan ayollar soni mingdan oshadi. Ularning aksari voyaga yetmagan qizlar edi. Millioner uzoq yillar voyaga yetmaganlar bilan muammosiz aloqa qilib kelgan. Politsiya 2005 yildagina uning ustidan tekshiruv boshlaydi. O‘shanda Epshteyn jinsiy aloqa qilgan 14 yoshli qizning ota-onasi politsiyaga murojaat qiladi. Qizni so‘roq qilish orqali politsiya Epshteyn oroliga olib borib jinsiy zo‘ravonlikka uchragan kamida 36 nafar 14 yoshli qizlarni aniqlaydi.
Lekin politsiya ishga jiddiy qaramaydi. Epshteyn atigi 13 oy qamoqqa hukm qilinadi, shunda ham bemalol ozodlikda ishini davom ettirish imkoni berilgan holda. Ya’ni, o‘sha vaqtdayoq yuzlab bolalarni jinsiy mayli uchun ishlatgan pedofil Amerika sudi tomonidan deyarli jazosiz qoldiriladi.
Moliyachi yana 14 yil kayf-u safoda hayot kechiradi, unga hech kim indamaydi, oroliga yuzlab voyaga yetmagan qizlarni olib borib amalda ularni qul qiladi. Va 2019 yilga kelib Epshteynni qamoqqa olishadi. Unga voyaga yetmagan bolalarni jinsiy ekpluatatsiya qilish ayblovi qo‘yiladi.
2019 yil iyulda qamalgan pedofil ikki oy o‘tib o‘z kamerasida o‘lik holatda topiladi. Rasmiy xabarga ko‘ra, Epshteyn kamerada o‘z joniga qasd qilgan. Lekin bir guruh sud-med ekspertlar Epshteyn o‘zini osmagan degan versiyani ilgari suradi. Ana shundan Epshteyn bilan bog‘liq fitna nazariyalariga rasman start beriladi. Amerika jamiyatida savol paydo bo‘ladi: bu millioner pedofil kim ediki uni qamoqxonada o‘ldirib ketishsa?!
