YeI elchisi Kiyevda Zaxarovaning haqoratomuz postiga javob qaytardi

RF TIVning rasmiy vakili Mariya Zaxarova 3 fevral kuni o‘zining X mikroblogida YeIning Kiyevdagi elchisi Katarina Maternovni masxara qildi. U Maternova navbatdagi RF hujumi vaqtida Kiyevdagi mehmonxonasining vannaxonasida matras ustida o‘tirgan holda tushirilgan suratni e’lon qilganini tilga olib, uni “hayotining ajoyib surati” deb atadi. Chorshanba kuni, 4 fevralda Maternova Facebook’da Zaxarovaning unga hujum qilishi sababi — u Rossiyaning Ukrainaga hujumlari keltirib chiqarayotgan dahshatlar haqida ochiq gapirayotganida, deb yozdi.

Zaxarova o‘z postida YeIni go‘yoki yillar davomida Donbassdagi odamlar taqdiri bilan qiziqmagan, hozir esa Ukrainadagi “qirg‘in”ni “moliyalayotgan”likda ayblaydi.

“Urush olib borayotgan agressorning og‘zaki vakili Rossiya raketalari va dronlaridan boshpana bo‘lgan ayolning suratini seksuallashtirsa, bu na men haqimda, na Yevropa Ittifoqi haqida biror narsa deydi — bu Mariya Zaxarova taqdim etayotgan rejim haqida hamma narsani aytadi”, — deya javob berdi Maternova.

U shu bilan birga, kechani vanna xonasida o‘tkazganini eslatdi, chunki Kiyev Rossiyaning dron va raketalar qo‘llangan navbatdagi ommaviy hujumiga uchragan. “Millionlab ukrainlar ham xuddi shu sabab bilan to‘rt yildan beri yerto‘lalarda, yo‘laklarda va bombadan panoh joylarida uxlamoqda”, — dedi u.

“Muzlayotgan kvartiralarda, vayron qilingan bolalar bog‘chalari yoki -23 darajada isitishsiz qoldirilgan shifoxonalarda hech narsa ajoyib emas. Qishni ommaviy qirg‘in quroli sifatida ishlatishda hech narsa kulgili emas. Tinch aholining azobini masxara qilish — bu diplomatiya emas. Bu — insoniylik libosini yechib tashlagan sof targ‘ibot”, — deb ta’kidlaydi yevropalik diplomat.

Yakunda Katarina Maternova hech narsa uni Rossiya Ukrainaga keltirayotgan dahshatlar haqida dunyoga aytishdan to‘xtatolmasligini bildirdi.

Ukraina Qurolli kuchlari Havo kuchlari ma’lumotlariga ko‘ra, 4 fevralga o‘tar kechasi Rossiya Ukrainaga 105 ta dron (uchuvchisiz uchish apparati) bilan hujum qilgan, shulardan taxminan 70 tasi Shahed turidagi dronlar bo‘lgan. Ular RFdagi Oryol, Bryansk, Primorsko-Axtarsk yo‘nalishlaridan, shuningdek Donetskdan va qo‘shib olingan Qrimdagi Chauda buruni tomondan uchirilgan.

Hisobotga ko‘ra, ertalabga kelib mamlakatning shimoli, janubi va sharqida 88 ta dron urib tushirilgan yoki neytrallashtirilgan. Shu bilan birga, 17 ta hujumkor dron 14 ta nuqtada nishonga tekkani va 5 ta nuqtada parchalar qulagani qayd etilgan.

4 fevral kuni Ukraina bosh vaziri Yuliya Sviridenko mamlakat energetikasidagi favqulodda vaziyat bo‘yicha o‘tkazilgan yig‘ilish yakunlari bo‘yicha, 2016 yil boshidan beri RF QK Ukraina energetika tizimiga 217 ta hujum sodir etganini ma’lum qildi.