Jizzax markazida yo‘l bezorilari: Ular kimning erkatoyi?

Jizzax shahrining markaziy ko‘chalari tunggi vaqtlarda jamoat yo‘li emas, yosh yigitlarning "avtodromi"ga aylanib qolmoqda: boshqalar hayotini bir chaqaga olmaydigan ba’zilar yo‘lda ko‘ngillari ne tusasa shuni qilishyapti. Ular hatto viloyat hokimligi va DXX binolari joylashgan markaziy ko‘chada ham o‘zlarini “erkin qush” kabi his qilib, mashinasini bemalol qarama-qarshi yo‘nalishda boshqarib, drift qilib yurishibdi. Ammo negadir ularning mushugiga hech kim pisht demayapti.

Jizzax shahri ko‘chalari shunchalik bedarvoza bo‘lib ketganmi? Onix avtomobili Jizzax shahrining Sharof Rashidov ko‘chasida bemalol manyovrlar qilib, yo‘lning qarama-qarshi tomoniga o‘tib, haydovchi o‘zini juda bemalol qo‘yganini ko‘rishimiz mumkin bo‘ladi. Ayni ko‘chada Jizzax viloyati hokimligi, Davlat xavfsizlik xizmatining Jizzax viloyat boshqarmasi binolari joylashgan. Xuddi o‘sha avtomashina Islom Karimov ko‘chasiga o‘tib, u yerda ham boshqa harakat ishtirokchilariga xalaqit berib, o‘zidan boshqa bir insonni, piyodalarni umuman hurmat qilmagan holda yana yo‘lning qarama-qarshi yo‘lagida harakatlanganini ko‘rish mumkin. Kun.uz manbasi xabar qilishicha, videolar 12 fevral kuni tunda olingan.

Umuman olganda, bu Jizzaxda sodir bo‘layotgan shu kabi qoidabuzarliklarning birinchisi emas. Biz oldin ham aynan Sharof Rashidov ko‘chasida, ya’ni Jizzax viloyati hokimligi va Davlat xavfsizlik xizmati binolari joylashgan ko‘chada qarama-qarshi yo‘lakda harakatlangan haydovchining xatti-harakatlari haqida video qilgandik va o‘sha video e’lon qilinmaguncha, Jizzax viloyati Yo‘l harakati xavfsizligi boshqarmasi holatga umuman rasmiy munosabat bermagan.

Kun.uz’ga ushbu videolarni yuborgan kuzatuvchilarning so‘zlariga ko‘ra, bu turdagi qoidabuzarliklar Jizzax shahri ko‘chalarida surunkali “kasallik”ga aylanib boryapti. Xususan, shaharning Mustaqillik, Toshkent ko‘chalarida ham haydovchilar tungi vaqtlarda poygalar uyushtirayotgani, bemalol, bamaylixotir ko‘chaning qarama-qarshi yo‘nalishida, ya’ni boshqa ishtirokchilarga xalaqit bergan holda tarallabedod qilib yurganini ham ko‘rishimiz mumkin. Bu videolar ham Kun.uz tahririyatida mavjud.

Yaqinda Jizzax shahrida 17 yoshli qizni piyodalar yo‘lakchasida o‘tayotganda Cobalt mashinasi urib yuborgandi.