Jizzaxda Nexia yuk mashinasi bilan to‘qnashdi, haydovchi halok bo‘ldi

Jizzax shahrida Nexia-3 rusumli yengil avtomobil yuk mashinasi bilan to‘qnashishi oqibatida haydovchi halok bo‘ldi. Bu haqda viloyat IIB matbuot xizmati xabar bermoqda.

Hodisa 9 dekabr kuni soat 05:10 atrofida shaharning «Xayrobod» MFY hududidan o‘tuvchi D-047 Jizzax–Do‘stlik–Gagarin-M39 avtomobil yo‘lining 5-kilometrida yuz bergan.

19 yoshli haydovchi Nexia-3 avtomobilini Olmachi–Xayrobod yo‘nalishi bo‘ylab boshqarib ketayotgan vaqtda rul boshqaruvini yo‘qotib, qarama-qarshi yo‘nalishda kelayotgan «KamAZ-53212» rusumli yuk avtomashinasi bilan to‘qnashib ketgan.

Haydovchi turli tan jarohatlari bilan RShTYoIM Jizzax filiali jonlantirish bo‘limiga yetkazilgan va o‘sha yerda vafot etgan.

Avvalroq Jizzax–G‘allaorol avtomobil yo‘lida o‘zidan oldinda ketayotgan mashinani quvib o‘tmoqchi bo‘lgan Matiz ZIL-130 yuk mashinasi bilan to‘qnashgan, oqibatda Matiz haydovchisi va 2 yo‘lovchisi voqea joyida halok bo‘lgani xabar qilingandi.