Sud qarorlari ijrosini to‘xtatish tartibi qat’iylashtirilishi mumkin

Loyihaga ko‘ra, qonuniy kuchga kirgan va yuqori instansiya sudida ko‘rib chiqilayotgan sud hujjatlarining ijrosini to‘xtatib turish faqat muayyan shartlar asosida amalga oshirilishi mumkin. Jumladan, sud qarorining ijrosini to‘xtatish uchun arizachi qaytarma ijroni ta’minlash imkoniyati mavjud emasligi yoki bu juda qiyin ekanini asoslab berishi, yoxud moliyaviy ta’minot taqdim etishi lozim bo‘ladi.

Shuningdek, apellyatsiya, kassatsiya va taftish instansiyalarida ish ko‘rib chiqilayotgan davrda sud qarorining ijrosi faqat shunday chora ko‘rilmasa, hal qiluv qarorining qaytarma ijrosi qiyinlashishi yoki umuman bajarib bo‘lmaydigan holatga kelishi mumkin bo‘lgan hollarda to‘xtatib turilishi mumkinligi belgilanmoqda.

Qonun loyihasi sud qarorlarining o‘z vaqtida ijro etilishiga erishish, qarzdorliklarni undirish jarayonida kechikishlarni kamaytirish hamda halol faoliyat yuritayotgan tadbirkorlik sub’yektlariga tegishli mablag‘larning o‘z vaqtida qaytarilishini ta’minlashga xizmat qilishi qayd etilgan.

Hujjatga muvofiq, Markaziy bank va boshqa manfaatdor tashkilotlar qonun ijrosini ta’minlashi hamda uning mazmun-mohiyatini aholi o‘rtasida tushuntirishi nazarda tutilmoqda. Vazirlar Mahkamasi esa hukumat qarorlarini qonunga muvofiqlashtirishi va tegishli normativ-huquqiy hujjatlarni qayta ko‘rib chiqishini ta’minlaydi.