Toshkentda yog‘ingarchilik va kuchli shamol kutilmoqda: fuqarolarga xavfsizlik choralari eslatildi

Bugun Toshkent shahri hududida yog‘ingarchilik va kuchli shamol bo‘lishi kutilmoqda. Shu munosabat bilan fuqarolardan xavfsizlik qoidalariga qat’iy rioya qilish so‘raldi.

Foto: Kun.uz

Tavsiyalarga ko‘ra, aholi:

yashash joylarida eshik-derazalar, chordoq hamda havo aylanish tizimlarini mahkam berkitishi;
ko‘chada daraxt va elektr ustunlari tagida turmasligi;
ko‘p qavatli uylar balkonlarida, deraza tokchalarida va tashqi hududdagi buyumlarni xavfsiz joyga olib qo‘yishi yoki mustahkamligini tekshirishi;
shamol kuchayganda mustahkam binolar, yer osti o‘tish yo‘llari hamda yashirinish mumkin bo‘lgan joylarda muhofazalanishi lozimligi qayd etildi.

Shuningdek, buzilgan binolarga kirish, xavfli ustunlar, reklama ustunlari va daraxtlar ortiga yashirinish taqiqlanishi eslatildi.

Toshkent shahar FVBB avtomobillarni daraxtlar va yengil konstruksiyali qurilmalar ostida qoldirmaslik, xonadonlarda esa gaz qurilmalarini doimiy nazorat qilib turishni tavsiya qildi.

Favqulodda holat yuz berganda quyidagi telefon raqamlariga murojaat qilish mumkin: 112, 1055, (71) 212-69-80, (71) 212-69-82.