Ukraina dronlari uchun “ikkinchi kontur”: ishlab chiqarish Britaniyaga kengaydi

Buyuk Britaniya hududida zarb beruvchi uchuvchisiz apparatlar (dronlar) ishlab chiqaradigan birinchi ukrain zavodi ish boshladi. Bu haqda Ukrainaning elchisi, Ukraina Qurolli kuchlari sobiq bosh qo‘mondoni Valeriy Zalujniy chorshanba, 25 fevral kuni xabar qildi. Uning Telegram’dagi yozuviga ko‘ra, ishlab chiqarish majmuasi Ukrspecsystems kompaniyasiga tegishli bo‘lib, u “dronlari yuqori texnologik urush sharoitida o‘z samaradorligini ancha oldin isbotlagan” kompaniya sifatida ta’riflangan.

Zalujniyning aniqlashtirishicha, kompaniyaning muhandislik markazi Ukrainada qoladi, ishlab chiqarish liniyalari esa Buyuk Britaniyaga ko‘chiriladi.

“Buyuk Britaniyada ishlab chiqarishni yo‘lga qo‘yish chuqur strategik mantiqqa ega. Bu og‘irlik markazini Ukrainadan ko‘chirish emas. Bu umumiy imkoniyatlarimizni kengaytirish va ishlab chiqarish uzluksizligini kafolatlaydigan barqarorlikning ikkinchi konturini yaratishdir”, — deb ta’kidladi Ukraina elchisi. U, shuningdek, “Ukraina doimiy raketa zarbalari, infratuzilmaning vayron bo‘lishi va ishlab chiqarishlar uchun tahdidlar sharoitida jang qilayotganini” eslatdi.

Zalujniy qo‘shimcha qilishicha, shu yo‘l bilan “ittifoqchilar faqat bir-birini qo‘llab-quvvatlabgina qolmay, balki xavfsizlik uchun umumiy sanoat bazasini ham shakllantirmoqda”. Sobiq bosh qo‘mondon so‘zlariga ko‘ra, Ukraina uchun bu qo‘shma korxona “barqarorlik va uzoq muddatli rejalashtirish imkoniyati”ni anglatadi, Buyuk Britaniya uchun esa — yangi ish o‘rinlari va real jang harakatlarida sinovdan o‘tgan texnologiyalarga kirish orqali o‘z mudofaa sanoatini kuchaytirishdir.

Ukraina va Buyuk Britaniya o‘rtasida qo‘shma ishlab chiqarish bo‘yicha kelishuvga erishilganini Ukraina prezidenti Volodimir Zelenskiy 2025 yil iyun oxirida, Britaniya bosh vaziri Kir Starmer bilan uchrashuv yakunlariga ko‘ra ma’lum qilgan edi. Ukraina prezidentining aytishicha, bunday hamkorlik Ukrainaga “muhim loyihalar uchun barqaror moliyalashtirish” olishga yordam beradi, eng avvalo — dron-tutuvchilar va zarb beruvchi dronlar ishlab chiqarishda.

Buyuk Britaniyadagi Ukraina elchisi Valeriy Zalujniy 18 fevral kuni AP agentligiga bergan intervyusida ilk bor omma oldida Ukraina prezidenti Volodimir Zelenskiy bilan munosabatlaridagi chuqur bo‘linish haqida gapirgan. Sobiq bosh qo‘mondonning aytishicha, keskinlik 2022 yil fevral oyida Rossiyaning to‘liq ko‘lamli bosqini boshlanganidan ko‘p o‘tmay paydo bo‘lgan va mamlakat mudofaasi usullari bilan bog‘liq bo‘lgan, keyin esa mojaro keskinlashgan.

2024 yil fevral oyida Zelenskiy Zalujniyni lavozimidan ozod qilib, uni Londonga elchi etib yuborgan. Tahlilchilar buni prezidentning o‘z siyosiy raqobatchisini chetlatishga urinishi sifatida baholagan. So‘rovlar gipotetik prezidentlik poygasida Zalujniy Zelenskiyni ortda qoldirishini (23 foizga qarshi 20 foiz) ko‘rsatmoqda, biroq general urush tugaguniga qadar siyosiy ambitsiyalarni muhokama qilishdan bosh tortmoqda.