Qoraqalpog‘iston va Xorazmda tabiiy gaz uchun isitish mavsumi bazaviy me’yori 15 martgacha uzaytirildi

Qoraqalpog‘iston Respublikasi va Xorazm viloyati aholisi uchun tabiiy gaz iste’moli bo‘yicha isitish mavsumida amal qiluvchi 500 kub metrlik bazaviy me’yor 2026 yilning 15 mart sanasiga qadar uzaytirildi.

Foto: Kun.uz

Energetika sohasi mutasaddilari ma’lum qilishicha, ushbu qaror «O‘zgidromet» tomonidan taqdim etilgan ob-havo prognozlari asosida qabul qilingan. Unga ko‘ra, mart oyining dastlabki o‘n besh kunida mazkur hududlarda havo haroratining me’yordan past bo‘lishi kutilayotgani qayd etilgan.

Aholini qo‘llab-quvvatlash, uy-joylarni barqaror isitish imkoniyatini ta’minlash hamda qo‘shimcha moliyaviy yuklamani yumshatish maqsadida prezident topshirig‘iga muvofiq, Vazirlar Mahkamasi tomonidan tegishli qaror qabul qilingan.

Ma’lumki, isitish mavsumi davrida belgilangan bazaviy me’yor doirasida iste’mol qilingan tabiiy gaz uchun to‘lovlar amaldagi tariflar bo‘yicha hisoblanadi. Mazkur me’yordan ortiqcha sarflangan hajm esa belgilangan tartibda yuqori tarif asosida to‘lanadi. Shu bois, bazaviy me’yorning uzaytirilishi aholi uchun qo‘shimcha yengillik yaratadi.

Mutaxassislar aholini xavfsizlik qoidalariga qat’iy rioya qilish, gaz jihozlaridan to‘g‘ri va tejamkor foydalanishga chaqirmoqda.