Daraxtlarni sovuq uradi

Hafta o‘rtalarida shimol hududlaridan mintaqaga kirib kelishi kutilayotgan sovuq arktik havo oqimi sabab, ko‘plab viloyatlarda dov-daraxtlarning kurtagi, guli va hosili xavf ostida qoladi. Iqlimshunos Erkin Abdulahatov haftadagi ob-havo kutilmalari bilan Kun.uz'ning jonli efirida tanishtiradi.

O‘zgidromet 10-12 mart kunlari respublikaning shimol hududlari uchun havo haroratining - 8 darajagacha, boshqa hududlar uchun - 3 darajagacha pasayib ketishi bilan bog‘liq ogohlantirish xabarini e’lon qildi.

Joriy yilning qish mavsumi butun meteorologik kuzatuvlar davrida eng issiq qish bo‘lgani, bo‘lib ham o‘tgan fevral oyi ayrim hududlarda xuddiki aprel kabi o‘tganini hisobga olsak, joriy sovuqlik kutilmasi ayni qishloq xo‘jalik sektori uchun turlicha zararlanishlarni taqdim etishi mumkin. Nabotot olami issiq fevral sabab, muddatidan ancha oldin o‘sish davriga kirib qoldi.

Shunga qaramay, Qoraqalpog‘iston Respublikasi va Xorazm viloyatlarida ushbu sovuqlik to‘lqini dov-daraxtlarga u qadar katta xavf tug‘dirmaydi. Chunki shimolda hozirda dov-daraxtlar erta uyg‘onish davriga kirib bormadi. Surxondaryo viloyati bog‘lari uchun (tog‘li hududlarini hisobga olmasa) joriy sovuqlik to‘lqini kuchli sovuq urishlarini taqdim etmaydi.

Ammo, boshqa viloyatlar, xususan, Buxoro, Navoiy, Samarqand, Sirdaryo, Jizzax va Toshkent kabi viloyatlar bog‘laridagi dov-daraxtlar guli, hosiliga kelayotgan sovuqlik to‘lqinining ta’siri katta. Vodiy viloyati aholisi esa sovuq urishiga qarshi samarali agrotexnik ta’sir choralarini qo‘llash orqali hosilni saqlab qolishlari mumkin.