Reyting: 2025 yilda eng ko‘p humanoid robot yetkazib bergan kompaniyalar

Jahon bozorida mutlaq yetakchi Xitoy bo‘ldi — umumiy sotuvlarning taxminan 90 foizi aynan shu mamlakat hissasiga to‘g‘ri keldi. Hozircha asosiy yetkazib berishlar ilmiy tadqiqotlar va sanoat sohasiga yo‘naltirilgan, ammo yaqin kelajakda bunday robotlar chakana savdodan tortib maishiy vazifalargacha bo‘lgan kengroq bozorga chiqishi mumkin.

Turli manbalardan jamlangan va Rest of World nashri tomonidan e’lon qilingan ma’lumotlarga ko‘ra, mazkur reyting soha jadal rivojlanayotgan bir paytda humanoid robotlar yetkazib berish hajmi bo‘yicha yetakchilik qilayotgan kompaniyalarni ko‘rsatadi.

2025 yilda birinchi o‘rinni Xitoyning Unitree kompaniyasi egalladi — u 5 500 ta robot yetkazib berdi. Bu ko‘rsatkich bir yil oldingi taxminan 1 500 donaga nisbatan ancha yuqori. Kompaniya modellari bozordagi eng ilg‘or va shu bilan birga eng hamyonbop robotlardan biri hisoblanadi. Masalan, R1 bazaviy modeli atigi taxminan 5 900 dollar turadi, kompaniyaning robot-itlari esa taxminan 1 600 dollardan sotiladi.

Ikkinchi o‘rinda — AgiBot kompaniyasi, u 5 168 ta qurilma sotgan. Uning modellarining eng past narxi taxminan 14 500 dollardan boshlanadi. Umuman olganda, 2025 yilda Xitoyda humanoid robotlarning 21 ta yangi modeli taqdim etildi, holbuki 2022 yilda ular atigi uchta edi.

Tadbirkor Ilon Maskning so‘zlariga ko‘ra, 2040 yilga borib humanoid robotlar soni odamlar sonidan oshib ketishi mumkin. Biroq Tesla bu yo‘nalishda ancha sekin ilgarilamoqda: 2025 yilda kompaniya Optimus modelining atigi 150 ta nusxasini yetkazib berdi, ommaviy sotuvlar esa faqat 2027 yilda boshlanishi kutilmoqda.

Shunga yaqin hajmlarni boshqa amerikalik ishlab chiquvchilar — Figure AI va Agility Robotics ham namoyish etdi.