WSJ: Eron yangi talablarni ilgari surmoqda

Islom inqilobi muhofizlari korpusi mamlakat ichkarisidagi ta’sirini kuchaytirgan va AQSh bilan ehtimoliy muzokaralar arafasida qator talablarni ilgari surmoqda. The Wall Street Journal nashri o‘z manbasiga tayanib yozishicha, bu talablar orasida Amerikaning Fors ko‘rfazi mamlakatlaridagi barcha bazalarini yopish talabi ham bor.

Gazeta Eron tomonining boshqa talablarini quyidagicha keltirgan:

• zarbalar uchun tovon to‘lash;
• Ho‘rmuz bo‘g‘ozida yangicha tartib o‘rnatish, bu Eronga o‘tayotgan kemalardan to‘lov undirish imkonini berishi kerak (Misr Suvaysh kanalidan foydalanganlik uchun to‘lov olishi kabi);
• urush qayta tiklanmasligi va Isroil Livandagi «Hizbulloh» guruhi bo‘ylab zarbalarini to‘xtatishi uchun kafolat;
• Eronga qarshi qo‘llangan barcha sanksiyalarni bekor qilish;
• Eron raketa dasturini saqlab qolish.

Amerikalik rasmiylardan biri bu talablarni «bema’ni va noreal» deb atagan. Arablar va amerikaliklar orasidagi manbalar bunday pozitsiya Tehron bilan kelishuvga erishishni yanada murakkablashtirishini qayd etishgan.

Shu kunlarda Reuters agentligi Eron o‘z pozitsiyasini qat’iylashtirgani va muzokaralar boshlanadigan bo‘lsa, AQShdan jiddiy yon berishni talab qilishi, jumladan, hujum qilmaslikka kafolat, shuningdek, urush davridagi yo‘qotishlar uchun tovon puli hamda Ho‘rmuz bo‘g‘ozi ustidan to‘liq nazoratni talab qilmoqchiligi haqida xabar bergandi.

AQSh ham Eronga 15 banddan iborat tinchlik rejasini yuborgan. Isroilning «12 kanal» telekanaliga ko‘ra, u Eron yadro dasturidan to‘liq voz kechishi, shuningdek, mintaqadagi proksi-guruhlarini qo‘llashni to‘xtatishi hamda o‘z raketalari soni hamda uchish masofasini qisqartirishga rozi bo‘lishini ko‘zda tutadi.