San’atkorlar har bir to‘y uchun alohida soliq to‘lashiga to‘g‘ri kelishi mumkin

O‘zbekistonda konsert-tomosha faoliyati bilan shug‘ullanuvchi shaxslarni soliqqa tortish bo‘yicha yangi tartib rejalashtirilmoqda. Adliya vazirligi bu haqda prezident qarori loyihasini jamoatchilik muhokamasiga qo‘ydi.

Taklif quyidagicha: 2026 yil 1 sentabrdan boshlab ijrochilar va ijodiy jamoalarning ijodiy faoliyati bilan bog‘liq barcha xizmatlari soliq organlarining “Soliq” mobil ilovasida ro‘yxatga olinadi.

Ijrochilar 2026 yil 1 sentabrdan 2029 yil 1 yanvarga qadar jismoniy shaxslardan olinadigan daromad solig‘ini “bir xizmat – bir to‘lov” tamoyili asosida, qat’iy belgilangan miqdorlarda to‘laydi. (Mehnat shartnomasi asosida mehnat vazifalarini bajarish bilan bog‘liq ijodiy faoliyat bundan mustasno).

“Bir xizmat – bir to‘lov” tamoyili doirasidagi soliq miqdori san’atkorning reytingi va xizmat ko‘rsatilgan joyga bog‘liq bo‘lib, bazaviy hisoblash miqdori bilan o‘lchanadi:

• 1-reyting guruhi ijrochilari: Toshkent shahrida – 3 BHM (hozirda 1 mln 236 ming so‘m); Nukus shahrida va viloyat markazlarida – 2 BHM (hozirda 824 ming so‘m); boshqa shaharlar va qishloq joylarda – 1 BHM (hozirda 412 ming so‘m).
• 2-reyting guruhi ijrochilari: Toshkent shahrida – 2 BHM; Nukus shahrida va viloyatlar markazlarida – 1 BHM; boshqa shaharlar va qishloq joylarda – 0,5 BHM.
• 3-reyting guruhi ijrochilari: Toshkent shahrida – 1 BHM; Nukus shahrida va viloyat markazlarida – 0,5 BHM; boshqa shaharlar va qishloq joylarda – 0,25 BHM.

Yuqorida keltirib o‘tilgan tartib 2026 yil 1 sentabrdan joriy etilgan taqdirda, shu sanadan e’tiboran konsert-tomosha faoliyatini amalga oshiruvchilar uchun yakka tartibdagi tadbirkorlar sifatida aylanmadan olinadigan soliqni to‘lash tartibi tatbiq etilmaydi.

Ijrochilar tomonidan mobil ilovaga tegishli ma’lumotlar kiritilmasligi va belgilangan miqdordagi to‘lov amalga oshirilmasligi – litsenziya talablarini qo‘pol ravishda buzish deb hisoblanadi.

2026 yil 1 sentabrdan tegishli ma’lumotlar “Soliq” ilovasiga kiritilmagan va belgilangan to‘lov amalga oshirilmagan taqdirda:

• bu – soliq bazasini yashirish (kamaytirib ko‘rsatish) deb e’tirof etiladi hamda shartnomalar o‘rtacha qiymatining 20 foizi miqdorida, lekin 20 BHM (hozirda 8 mln 240 ming so‘m)dan kam bo‘lmagan summada jarima qo‘llaniladi.
• ushbu huquqbuzarlik haqida xabar bergan jismoniy shaxslarga, ushbu ma’lumot asosida o‘tkazilgan tekshirish yakuniga ko‘ra huquqbuzardan undirilgan jarima summasi hisobidan qo‘llanilgan jarimaning 20 foizi miqdorida mukofot to‘lanadi.

Madaniyat vazirligining hududiy bo‘limlari mahalla soliq inspektori bilan birgalikda o‘ziga biriktirilgan hududda joylashgan to‘y-marosimlar o‘tkaziladigan joylar, restoranlar, konsert zallari, stadionlar, klublar, diskotekalar, kafe-barlarda, tantanalar zallarida ijrochilar qonuniy asosda ijodiy xizmat ko‘rsatayotganini muntazam nazorat olib boradi.

2029 yil 1 yanvardan boshlab esa:

• konsert-tomosha faoliyatini litsenziya asosida amalga oshiruvchilar o‘z xizmati uchun to‘lovni faqat naqdsiz shaklda qabul qilishi talab etiladi;
• jismoniy shaxslardan olinadigan daromad solig‘i stavkasi ijrochilar va mijozlar o‘rtasidagi shartnoma qiymatidan kelib chiqqan holda, biroq qat’iy miqdorlardan kam bo‘lmagan miqdorda belgilanadi;
• konsert-tomosha xizmatlarini ko‘rsatish – aholi va barcha sub’yektlar tomonidan “Soliq” mobil ilovasida xizmat ko‘rsatish joyi, sanasi, qiymati to‘g‘risidagi ma’lumotlarni aks ettirish bilan bir qatorda, mas’uliyatni o‘z zimmasiga olgan holda ommaviy oferta tarzidagi shartnomalarni ro‘yxatdan o‘tkazish tartibida amalga oshiriladi;
• jismoniy shaxslardan olinadigan daromad solig‘i va ijtimoiy soliqni hisoblash, ushlab qolish, budjetga o‘tkazish, hisobotlarni taqdim etish soliq organi tomonidan avtomatik tarzda amalga oshiriladi; bunda soliq organlari soliq hisobotini taqdim etish muddatidan kechiktirmay soliq summasini mobil ilovaga biriktirilgan bank kartalaridan avtomatik tarzda undirib oladi, yetarli mablag‘ mavjud bo‘lmagan qismi bo‘yicha esa hisobot kuni to‘lov xabarnomasi yuboriladi;
• yillik umumiy daromadning 30 foizi miqdoridagi xarajatlar tasdiqlovchi hujjatlarsiz chegirib tashlanadi;
• tasdiqlangan xarajatlar summasi umumiy daromadning 30 foizidan oshgan taqdirda, qo‘shimcha ravishda ushbu daromadning 10 foizi miqdori chegiriladi;
• litsenziya olish uchun undirilgan davlat boji va ijtimoiy soliq summalari xarajat sifatida qayd etiladi hamda daromadlar tarkibidan chegiriladi.

Qaror loyihasi bo‘yicha jamoatchilik muhokamasi 10 aprelgacha davom etadi.