Ayrim o‘zbekistonliklar Vladivostok aeroporti orqali Rossiyaga kiritilmadi

«Dunyo» axborot agentligi xabar qilishicha, suhbat davomida O‘zbekiston tomoni 2026 yil 1 fevraldan 25 martgacha bo‘lgan vaqt oralig‘ida ayrim fuqarolar Vladivostok xalqaro aeroporti orqali Rossiyaga kiritilmaganini ma’lum qilgan.

Qayd etilishicha, Rossiya tomoni nazoratni kuchaytirgani va qo‘shimcha tekshiruvlar joriy qilgani sababli Uzbekistan Airways va Centrum Air aviakompaniyalari parvozlar jadvaliga o‘zgartish kiritishga majbur bo‘lgan. Bu esa O‘zbekistondan kelayotgan yo‘lovchilar soni kamayishiga olib kelgan.

Uchrashuvda mazkur holat ikki davlat o‘rtasidagi sayyohlik aloqalari va savdo-iqtisodiy hamkorlikka ham salbiy ta’sir ko‘rsatayotgani ta’kidlangan. Jumladan, Navobod Naslli Parranda fermer xo‘jaligi va “AgroPtitsa” kompaniyasi o‘rtasidagi 20 million dollarlik kelishuv doirasida O‘zbekistondan Primore hududiga inkubatsiya tuxumlarini yetkazib berish jarayonida ham qiyinchiliklar yuzaga kelayotgani aytilgan.

Shuningdek, muloqotda Primore hududida vaqtincha bo‘lib turgan vatandoshlarning huquqlarini himoya qilish masalasiga alohida e’tibor qaratildi. Xususan, migratsiya qoidalarini buzgani uchun ushlangan fuqarolar bilan bog‘liq holatlar muhokama qilindi.

Ma’lum qilinishicha, ayni paytda Rossiyadagi vaqtincha saqlash markazlarida yuz nafardan ortiq fuqaro saqlanayotgan bo‘lib, ularni tezroq vatanga qaytarish masalasi ham ko‘rib chiqilgan.

Yevgeniy Volosastov o‘z navbatida ushbu masalalarni Primore hududidagi mas’ul idoralar bilan birgalikda ko‘rib chiqish va vaziyatni yaxshilash uchun qo‘shimcha muzokaralar o‘tkazishga tayyorligini bildirgan. Shuningdek, u O‘zbekiston bilan hamkorlikni davom ettirish va mintaqadagi O‘zbekiston fuqarolarining huquq hamda manfaatlarini himoya qilishga alohida e’tibor qaratilishini ta’kidlagan.