“Haqiqatga to‘g‘ri kelmaydi” – Toshkent viloyati IIBB PPX xodimi bilan bog‘liq xabarga munosabat bildirdi

Toshkent viloyati IIBB axborot xizmati PPX xodimi bilan bog‘liq xabar yuzasidan rasmiy munosabat bildirdi. Boshqarmaga ko‘ra, surishtiruvlar davomida tarqatilayotgan xabarda keltirilgan iddaolar mutlaqo haqiqatga to‘g‘ri kelmasligi ma’lum bo‘lgan.

“Joriy yilning 27 aprel kuni soat tungi 00:40 da Ohangaron shahar IIB PPX xodimiga tanishi 22 yoshli A.K. (ayol) qo‘ng‘iroq qilib, undan maslahat olish zaruratini aytib chaqirgan. PPX xodimi yetib borgan vaqtida A.K. bilan uning 14 yoshli qiz tanishi birga chiqib, xodimning mashinasiga o‘tirgan. Shu vaqtda 18 yoshli A.X. (videoda murojaat yo‘llagan shaxs) 4 nafar tanishlari bilan kelib, xodimni haqoratlab, janjal ko‘targan. U aslida 14 yoshli qizning hech qanday qarindoshi hisoblanmaydi”, deyiladi.

Boshqarma holat voyaga yetmagan qiz ishtirokida bo‘lgani sababli, to‘liq tafsilotlar hozircha ochiqlanmasligini ma’lum qilgan. Shuningdek, ish yakuniga ko‘ra yolg‘on axborot tarqatgan shaxslarga nisbatan ma’muriy, og‘ir oqibatlarga olib kelgan taqdirda jinoiy javobgarlik choralari ko‘rilishi qo‘shimcha qilingan.

Avvalroq Ohangaron shahrida PPX xodimi 14 yoshli qizni dugonasi bilan birga tog‘li hududga olib borib, ularga shilqimlik qilgani haqidagi xabarlar tarqalgandi. IIV Jamoat xavfsizligi departamenti holat tekshirilayotganini, xodim ishdan bo‘shatilganini ma’lum qilgan edi.