Rossiya va Ukraina o‘rtasidagi vaqtinchalik sulh buzilmoqda. Voqealar rivoji

Rossiya va Ukraina 4 may kuni o‘t ochishni vaqtincha to‘xtatmoqchi ekanini e’lon qilgandi – ammo ular o‘z qarorlarini kelishib ololmadi. RF mudofaa vazirligi 8-9 may kunlari «G‘alaba kuni bayrami sharafiga sulh» bo‘lishini ma’lum qildi. Volodimir Zelenskiy esa bunga javoban Ukraina «sukunat rejimi»ni oldinroq – 6 mayga o‘tar kechasi boshlashini ma’lum qildi. Harbiy harakatlar to‘xtatilmadi. Ukraina Rossiyani «sukunat rejimi»ni buzishda aybladi va amalda 9 may kuni sulh bo‘lmasligini e’lon qildi. Quyida voqealar qanday rivojlangani ko‘rib chiqiladi.

29 aprel
↓
Vladimir Putin va Donald Tramp telefon orqali gaplashdi. Kreml versiyasiga ko‘ra, RF prezidenti G‘alaba kunini nishonlash vaqtida otashkesim e’lon qilish taklifini berdi. Trampning versiyasiga ko‘ra, aslida u Putinga «qisqa muddatli sulh» taklif qilgan.

30 aprel
↓
Volodimir Zelenskiy o‘z vakillariga Tramp jamoasi bilan bog‘lanishni va «gap aynan nima haqida ketayotgani»ni aniqlashni topshirdi. Ukrainaning taklifi – «uzoq muddatli otashkesim» edi.

30 aprel
↓
Kremldagilar Ukraina ham xuddi shunday yo‘l tutishga rozi bo‘lish-bo‘lmasligidan qat’i nazar Rossiya G‘alaba kuni o‘t ochishni to‘xtatmoqchi ekanini ma’lum qildi.

4 may
↓
Rossiya Mudofaa vazirligi xabarida Putinning qarori bilan Rossiya ikki kun – 8 va 9 may kunlari davom etadigan sulh e’lon qilayotgani aytilgan. Vazirlik agar Ukraina G‘alaba kuni bayramini buzishga harakat qilsa, Rossiya qo‘shinlari «Kiyev markaziga raketalar bilan yopirilma zarba berishi» ta’kidlangan.

4 may
↓
Zelenskiy 6 mayga o‘tar kechasi boshlanadigan «sukunat rejimi» e’lon qildi. «Ko‘rsatilgan vaqtdan boshlab bir xilda harakat qilamiz», – degan Ukraina prezidenti. Moskvadagilar bunga hech qanday munosabat bildirmadi.

6 may
↓
Zelenskiy tomonidan e’lon qilingan «sukunat rejimi» kuchga kirdi. Ukraina qurolli kuchlari Rossiya Ukrainaga uchta raketa va 108 ta zarbdor dron bilan hujum qilganini ma’lum qildi. Kiyev Moskvani «sukunat rejimi»ni buzishda aybladi. O‘z navbatida, RF mudofaa vazirligi havo hujumidan mudofaa kuchlari tunda Rossiya regionlari va Qora dengiz akvatoriyasida ukrainlarning 53 ta droni hujumini qaytargani to‘g‘risida hisobot berdi.

6 may kunining ikkinchi yarmi
↓
Zelenskiy Rossiya «sukunat va insonlar hayotini saqlab qolish»dan bosh tortganini ma’lum qildi.

6 may kuni kechqurun
↓
Kyiv Independent nashri ukrainalik yuqori martabali mulozimga tayanib, Ukraina G‘alaba kuni sulhga amal qilishdan «ma’no ko‘rmayotgani» haqida xabar qildi. BBC’ning Ukraina hukumatidagi manbalari esa Zelenskiy «hali 9 may yuzasidan bir qarorga kelmagani»ni ma’lum qilgan: «U [Zelenskiy] bunday sharoitda kunma-kun hal qiladi, ya’ni ular bugun hujum qilishsa, unda biz ertaga hujum qilamiz». 

6 may kuni kechqurun
↓
Zelenskiy Rossiya hukumati 9 may kungi parad arafasida havo hujumidan mudofaa vositalarini Moskvaga yig‘ayotganini aytdi. Uning fikricha, bu Ukraina zarbalari uchun «qo‘shimcha imkoniyat» yaratadi. «Bu Rossiya hukumati shuncha bayonot berganiga qaramay, o‘t ochishni to‘xtatishga tayyorlanmayotgani va Rossiyaning butun hududini himoyalashdan ko‘ra Moskvadagi parad uchun ko‘proq qayg‘urayotganidan darak beradi», – deb hisoblaydi u.

7 may
↓
Zelenskiy Ukraina Rossiya zarbalariga teng miqdorda javob qaytarishini aytdi. Ukrainp prezidenti xabar qilishicha, Rossiya armiyasi kun boshidan Ukraina bo‘ylab dronlar, raketalar va aviabombalar bilan hujum qilgan.

«Bularning barchasi shuni ko‘rsatadiki, Rossiya o‘t ochishni to‘xtatish imkoniyatini jiddiy ko‘rib chiqmayapti va Rossiya rahbariyatini xavotirga solayotgan yagona narsa – Qizil maydondagi qisqa muddatli sukunatdir. Rossiya odamlarni o‘ldirishda davom etmoqda va mutlaqo  noxolislik bilan Moskvaning bir qismida bir necha soatlik sukunat uchun qayg‘urmoqda.

Ukraina adolat asosida harakat qiladi. Biz 6 may kuni yarim tundan sukunat taklif qilgandik. Bu rejim esa kecha va bugun Rossiya tomonidan buzilmoqda. Rossiya zarbalariga javob ham xuddi shunday bo‘ladi – uzoq masofali zarbalar. Rossiya diplomatiyaga o‘tishga tayyor bo‘lsa, biz ham diplomatiya yo‘lidan boramiz», – dedi Volodimir Zelenskiy.