Hafta davomida harorat ko‘tarila boshlaydi

Dushanba kunduzi O‘zbekiston hududining katta qismida quruq ob-havo kuzatiladi. Faqat Toshkent viloyatining ayrim joylarida va Farg‘ona vodiysi viloyatlarida qisqa muddatli yomg‘ir yog‘ishi, momaqaldiroq bo‘lishi mumkin, deyaxabar berdi O‘zgidromet.

26–27 may kunlari respublika bo‘yicha ba’zi joylarda qisqa muddatli yomg‘ir yog‘adi, momaqaldiroq kuzatiladi. Ushbu kunlarda havo harorati +25…+30 daraja atrofida, janubda va cho‘l hududlarda ba’zi joylarda +33…+35 darajagacha bo‘ladi.

28 mayda respublikaning tekislik hududlarida yog‘ingarchilik kutilmaydi. Havo harorati 2–3 darajaga ko‘tariladi.

29–31 may kunlari O‘zbekiston bo‘yicha yog‘ingarchiliksiz ob-havo bo‘lishi kutilmoqda. Havo harorati asta-sekin ko‘tarilishi davom etadi, kunduz kunlari +35…+38 darajagacha ko‘tariladi.

Tog‘oldi va tog‘li hududlarda yomg‘ir yog‘adi, 25–28 may kunlari vaqti-vaqti bilan qisqa muddatli yomg‘ir yog‘adi, momaqaldiroq kuzatiladi. Ayrim joylarda kuchli jala yomg‘ir yog‘adi, do‘l yog‘ishi ehtimoli bor. 25–31 may kunlari sel-suv toshqin hodisalari yuzaga kelishi mumkin.

Shamol 7–12 metr/soniya tezlikda esadi, ba’zi joylarda 13–18 metr/soniyagacha kuchayishi, 26–27 may kunlari shimolda va cho‘l hududlarda ba’zida 20–22 metr/soniyagacha kuchayishi, ayrim joylarda chang-to‘zonlar bilan kuzatilishi mumkin.

Toshkent shahrida dushanba kunduzi yog‘ingarchilik kutilmaydi. Harorat +26…+28 daraja bo‘ladi. 26 mayda kechga tomon va 27 mayda kun davomida qisqa muddatli yomg‘ir yog‘ishi, momaqaldiroq bo‘lishi mumkin. Harorat kechasi +16…+18 daraja, kunduzi 26 mayda +28…+30 daraja, 27 mayda +26…+28 daraja bo‘ladi.

28–31 may kunlari yog‘ingarchilik kutilmaydi. Harorat asta-sekin +33…+36 darajagacha ko‘tariladi. Shamol 3–8 metr/soniya tezlikda esadi, 26–27 may kunlari 10–12 metr/soniyagacha kuchayadi.