Sho‘rtan GKMni kengaytirish doirasidagi 643 mlrd so‘mlik talon-toroj fosh etildi

Soliq qo‘mitasi, Buxoro viloyati soliq boshqarmasi, “O‘zbekneftgaz” va yana to‘rtta korxona (xususan, “S.E.” MChJ QK hamda “E.E.” MChJ QKning O‘zbekistondagi doimiy muassasasi) mas’ullari o‘zaro til biriktirgani aniqlandi. Ma’lum bo‘lishicha, ular Sho‘rtan gaz-kimyo majmuasining ishlab chiqarish quvvatini kengaytirish loyihasi ortidan 643,2 mlrd so‘mni talon-toroj qilgan.

Sho‘rtan gaz-kimyo majmuasi / Foto: Enter Engineering

Bosh prokuratura huzuridagi Departament tomonidan Soliq qo‘mitasi komplayens va korrupsiyaga qarshi nazorat boshqarmasi bilan hamkorlikda o‘tkazilgan tergovga qadar tekshiruvda 643 mlrd so‘mlik talon-toroj holati fosh etildi.

Departament xabariga ko‘ra, O‘zbekiston Respublikasi Soliq qo‘mitasi, Buxoro viloyati soliq boshqarmasi, “O‘zbekneftgaz” AJ, “SH.G.” MChJ, “S.E.” MChJ QK, “A.” MChJ va “E.E.” MChJ QKning O‘zbekistondagi doimiy muassasasi mas’ul shaxslari o‘zaro til biriktirib, Sho‘rtan gaz-kimyo majmuasining ishlab chiqarish quvvatini kengaytirish bo‘yicha berilgan 5,3 trln so‘mlik xizmatlar QQSdan ozod etilgan bo‘lsa-da, QQS summasini elektron hisob-fakturalarga noqonuniy kiritib, budjetda asossiz ravishda QQS mablag‘ini hosil qilib, ushbu mablag‘ni “A.” MChJning hisobraqamiga qaytarilishiga va “S.E.” MChJ QKning davlat oldidagi kreditorlik qarzdorliklarining yo‘q qilinishiga erishib, 643,2 mlrd so‘mlik budjet mablag‘larini o‘zlashtirish va rastrata qilish yo‘li bilan talon-toroj qilgani aniqlangan.

Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.

Gap qaysi loyiha haqida ketayotgani, Qashqadaryodagi zavod loyihasiga Buxoro viloyati soliq boshqarmasining qanday aloqasi borligi haqida (loyiha Sho‘rtandan Qorako‘lga ko‘chirilgan) Kun.uz'ning 2023 yilgi surishtiruvidan javob olish mumkin:

Yana Saneg, yana parda ortidagi ishlar. Navbat – 1,8 mlrd dollarlik loyihaga