Kiyev Rossiyaga qarshi dron hujumlarini kuchaytirishini ma’lum qildi

Zelenskiyning xabar berishicha, UXX rahbari vazifasini vaqtincha bajaruvchi Yevgeniy Xmara unga amalga oshirilayotgan maxsus operatsiyalar, shuningdek, Rossiyaga qarshi «uzoq va o‘rta masofali sanksiyalar» deb ataluvchi choralar hamda UXXning «Alfa» maxsus operatsiyalar markazi faoliyati yuzasidan hisobot taqdim etgan.

Ukraina rasmiylari «uzoq va o‘rta masofali sanksiyalar» deganda Rossiya hududidagi harbiy va energetika obektlariga, jumladan Ukraina chegarasidan uzoq joylashgan hududlar va Rossiya tomonidan qo‘shib olingan Qrimdagi nishonlarga dronlar orqali amalga oshirilayotgan zarbalarni nazarda tutadi.

Zelenskiyning ta’kidlashicha, UXX so‘nggi bir necha oy davomida turli xil uchuvchisiz qurilmalardan samarali foydalanish orqali frontda Ukraina pozitsiyalarini himoya qilish bo‘yicha yuqori natijalarga erishgan.

Shuningdek, u UXXning «Alfa» maxsus operatsiyalar markazini Rossiya armiyasining tirik kuchi va harbiy texnikasiga eng ko‘p zarar yetkazgan bo‘linmalardan biri sifatida e’tirof etgan.

Rossiyani muzokaralarga undash maqsad qilingan

24 iyun kuni Zelenskiy Ukraina «Katta yettilik» (G7) davlatlari bilan muhokama qilingan zarur vositalarga ega bo‘lsa, Rossiyani tinchlikni tanlashga majbur qila olishini aytgan edi. Biroq u hamkorlar bilan aynan qanday yordam masalasi muhokama qilinganiga aniqlik kiritmagan.

Qrim va Rossiya hududidagi hujumlar kuchaymoqda

So‘nggi vaqtlarda Ukraina Rossiya tomonidan qo‘shib olingan Qrim yarimoroli hamda Rossiyaning ayrim hududlaridagi harbiy va energetika infratuzilmasiga dronlar orqali hujumlarni kuchaytirdi.

25 iyunga o‘tar kechasi Ukraina dronlari Krasnodar o‘lkasining Krasnoarmeysk tumanida joylashgan «Poltavskaya» neft bazasiga hujum qildi. Krasnodar o‘lkasi tezkor shtabi ma’lumotiga ko‘ra, dron bo‘laklari tushishi oqibatida obektda yong‘in yuzaga kelgan.

Mazkur neft bazasi Krasnodar o‘lkasining bir qismi hamda Adigeya Respublikasiga yonilg‘i yetkazib beradi.

Shu kechaning o‘zida bir qator Telegram kanallari Qrimda ham dron hujumlari amalga oshirilganini xabar qildi. «Krymskiy veter» kanali ma’lumotiga ko‘ra, Balaklava va Tavriya issiqlik elektr stansiyalari nishonga olingan, shuningdek, «Kacha» harbiy aerodromi yaqinida kuchli portlash sodir bo‘lgan.

Xabarlarga ko‘ra, Simferopol, Yalta va Yevpatoriya atrofida dron hujumlari tufayli elektr ta’minotida qisqa muddatli uzilishlar ham kuzatilgan.