Qoʻshimcha funksionallar
-
Tungi ko‘rinish
Bekobodda yangi sohil, muzey va bog‘: prezident amalga oshirilgan ishlar bilan tanishdi
Shavkat Mirziyoyev 13 iyul kuni Bekobod shahriga tashrifi chog‘ida yangi infratuzilma va obodonlashtirish loyihalari bilan tanishdi. Prezident mahalla faollari bilan muloqotda amalga oshirilayotgan barcha ishlar aholi turmush sifatini yaxshilashga xizmat qilishi va odamlar islohotlar natijasini o‘z mahallasida his qilishi lozimligini qayd etdi.
Prezident Shavkat Mirziyoyev 13 iyul kuni Toshkent viloyatining Bekobod shahriga tashrifi davomida “Xos yoz” kanali bo‘yi va Do‘stlik mahallasida amalga oshirilgan bunyodkorlik ishlari bilan tanishdi.
Qayd qilinishicha, hududni kompleks rivojlantirish bo‘yicha master-reja doirasida 3 kilometr uzunlikda maxsus piyodalar yo‘lagi va 5,4 kilometrlik mustahkam to‘siqlar qurildi, 2 ta ko‘prik qad rostladi. Shuningdek, loyiha natijasida sohil bo‘yida 27 ta yangi savdo va zamonaviy xizmat ko‘rsatish obekti tashkil etilib, 167 ta yangi doimiy ish o‘rni yaratildi.
Davlat rahbari bu yerda sport bilan shug‘ullanayotgan yoshlar bilan suhbatlashdi.
Do‘stlik mahallasi hududi hozir 28 gektarni tashkil etadi. Bu yerda 33 ta ko‘p qavatli uy, xususiy maktabgacha ta’lim tashkiloti, futbol maydoni, 16 ta sport va bolalar maydonchasi hamda kutubxona mavjud.
Ta’kidlanishicha, joriy yilda tadbirkorlar tomonidan 1,1 milliard so‘m investitsiya kiritilib, 10 ta xizmat ko‘rsatish obekti va 1 ta umumiy ovqatlanish shoxobchasi tashkil etildi. Natijada 25 ta yangi ish o‘rni yaratildi. Shuningdek, tashabbuskorlar mablag‘lari hisobidan “Vatanparvar bog‘i” ham barpo qilindi. Unda harbiy texnika namunalari o‘rnatilib, xizmat ko‘rsatish obektlari qurildi.
“Tashabbusli budjet” mablag‘lari hisobidan mahalla hududida Bekobod shahri muzeyi tashkil etildi.
Mahallada keksalar va mehnat faxriylarining dam olishi, uchrashuvlar, davra suhbatlari hamda ma’naviy-ma’rifiy tadbirlar o‘tkazish uchun yog‘och konstruksiyali yozgi shiypon qad rostladi.
Davlat rahbari mahalladagi bunyodkorlik ishlarini ko‘zdan kechirib, aholi uchun yaratilgan sharoitlar bilan tanishdi. Mahalla faollari va mehnat faxriylari bilan samimiy muloqot qildi.
– Barcha amalga oshirayotgan ishlarimiz, barpo etilayotgan obektlarimiz va loyihalarimiz, avvalo, aholiga xizmat qilishi, insonlar hayotini yaxshilashi kerak. Odamlar o‘z mahallasida, shahrida kechayotgan o‘zgarishlarni his qilishi, ularning samarasini kundalik hayotida ko‘rishi kerak.
Har safar hududlarga kelganimizda insonlar Yangi O‘zbekiston islohotlarining nafasini, uning yangilanish va taraqqiyot shabodasini his etishi zarur. Bekobod shahri ham o‘zining mehnatkash va fidoyi aholisi, iqtidorli yoshlari, hayot tajribasiga ega nuroniylari bilan yanada obod va taraqqiy etgan maskanga aylanishi kerak.
Biz yoshlarimizning orzu intilishlari, nuroniylarimizning ezgu niyat va maqsadlari ro‘yobga chiqishi uchun barcha imkoniyatlarni safarbar etamiz, – dedi prezident.
Shu bilan prezidentning Bekobodga safari yakunlandi va Toshkentga qaytdi.
