Yo‘lbo‘yi pulli avtoturargohlar uchun haq to‘lamaganlarga jarima qo‘llanishi mumkin

O‘zbekistonda yo‘lbo‘yi to‘xtash joylaridan foydalanganlik uchun haq to‘lamaganlik yoki to‘lovdan bo‘yin tovlash uchun ma’muriy javobgarlik belgilanishi mumkin. Toshkent shahri hokimligi «To‘xtab turish joylariga doir talablarga rioya etmaganlik uchun ta’sir choralarini belgilash bo‘yicha O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida» tashabbus bilan chiqdi.

Loyihada Ma’muriy javobgarlik to‘g‘risidagi kodeksni «pulli to‘xtab turish joylaridan foydalanganlik uchun to‘lov qilishdan bo‘yin tovlash» deb nomlangan yangi 128−11-modda bilan to‘ldirish ko‘zda tutilgan.

Loyihaga ko‘ra, yo‘lbo‘yi pulli to‘xtash joylaridan foydalanganlik uchun belgilangan muddatda haq to‘lamaslik yoki to‘lovdan bo‘yin tovlash BHMning 2 baravari (1 sentabrgacha – 824 ming so‘m, 1 sentabrdan boshlab – 880 ming so‘m) miqdorida jarimaga sabab bo‘ladi. Bu norma qonunchilikka muvofiq to‘xtash joylaridan bepul yoki imtiyozli foydalanish huquqiga ega bo‘lgan shaxslarga nisbatan tatbiq etilmaydi.

To‘lov amalga oshirilmaganini maxsus avtomatlashtirilgan foto va video qayd etish texnika vositalari orqali aniqlash taklif etilmoqda. Bunday huquqbuzarliklarni ko‘rib chiqish va ma’muriy jazo tayinlash yo‘l-patrul xizmati xodimlariga topshirilishi mumkin.

Loyihaga ilova qilingan tushuntirish xatida keltirilishicha, Toshkentda pulli avtoturargohlardan kuniga taxminan 15 ming haydovchi foydalanmoqda, shundan faqat 2–3 foizi, ya’ni 300−450 nafar atrofidagi haydovchi xizmat haqini to‘lamoqda.

Shuningdek, bir oy davomida bu xizmatdan taxminan 465 ming nafar haydovchi foydalanadi. Ulardan faqat 9300–12 950 nafari to‘lovni amalga oshiradi.

Javobgarlik joriy etilishi haydovchilarning to‘lov intizomini oshirish, pulli avtoturargohlar tizimi ishlashini ta’minlash va ulardan foydalanish qoidabuzarliklarini kamaytirishga xizmat qilishi kerakligi qayd etilgan.

28 iyulga qadar regulation.gov.uz portalida e’lon qilingan ushbu loyiha yuzasidan taklif va mulohazalarni bildirish mumkin.