Mol-mulk va yer solig‘i bo‘yicha imtiyoz olish tartibi belgilandi

Jismoniy shaxslarning mol-mulk va yer soliqlari bo‘yicha imtiyozlardan foydalanish uchun elektron murojaat yuborish tartibi tasdiqlandi. Arizalar soliq xizmatlari portali yoki my.gov.uz orqali qabul qilinib, uch ish kunigacha bo‘lgan muddatda ko‘rib chiqiladi.

Vazirlar Mahkamasining 2026 yil 16 iyuldagi 389-son qarori bilan jismoniy shaxslarga mol-mulk va yer soliqlari bo‘yicha imtiyozlarni elektron tarzda rasmiylashtirish imkonini beruvchi ma’muriy reglament tasdiqlandi.

Hujjatga muvofiq, fuqarolar soliq imtiyozidan foydalanish uchun Elektron soliq xizmatlari portali yoki Yagona interaktiv davlat xizmatlari portali — my.gov.uz orqali murojaat yuborishi mumkin.

Elektron murojaat kelib tushgach, soliq organining mas’ul xodimi taqdim etilgan ma’lumotlarni soliq organlarida mavjud axborotlar asosida ikki ish kuni ichida o‘rganadi. Tekshiruv yakunlariga ko‘ra, soliq imtiyozini qo‘llash yoki uni rad etish haqida xulosa rasmiylashtiriladi.

Soliq organining tegishli xulosasi yana bir ish kuni ichida fuqaroning Elektron soliq xizmatlari portalidagi shaxsiy kabinetiga yoki my.gov.uz portali orqali yuboriladi.

Murojaat rad etilgan taqdirda, fuqaro rad etishga sabab bo‘lgan kamchiliklarni bartaraf etib, takroran ariza berish huquqiga ega. Qayta yuborilgan murojaat ham belgilangan reglament talablari asosida ko‘rib chiqiladi.

Yangi tartib soliq imtiyozlarini olish jarayonini soddalashtirish, ortiqcha qog‘ozbozlikni kamaytirish va davlat xizmatlaridan masofadan foydalanish imkoniyatlarini kengaytirishga qaratilgan.