Қонунчилик палатаси мажлисида киберхавфсизликни таъминлаш ҳамда рақамли муҳитдаги ҳуқуқбузарликларга қарши курашиш тизимини такомиллаштиришга қаратилган қонун лойиҳаси иккинчи ўқишда моддама-модда кўриб чиқилди.
Қайд этилишича, депутатлар таклифлари ва ҳуқуқни қўллаш амалиёти асосида ҳужжатнинг бир қатор нормалари қайта ишланди.
Хусусан, «Тўловлар ва тўлов тизимлари тўғрисида»ги қонунга киритилаётган ўзгартишларга мувофиқ, киберхавфсизлик талабларига риоя этилмагани ёки шубҳали (фрод) операцияларнинг олдини олиш чоралари кўрилмагани натижасида фуқароларга моддий зарар етказилса, ушбу зарарни банклар, тўлов тизими операторлари ёки тўлов ташкилотлари қоплаши белгиланмоқда.
Шунингдек, Маъмурий жавобгарлик тўғрисидаги кодексга киритилаётган янги нормалар билан масофавий давлат хизматлари тизимидаги шахсий аккаунтлар ёки абонент қурилмасининг идентификация модулларини ғаразли мақсадларда бошқа шахсларга бериш, шунингдек, ўзга шахснинг аккаунти ёки абонент рақамидан ноқонуний фойдаланиш учун маъмурий жавобгарлик жорий этилади.
Жиноят-процессуал кодексига киритилаётган ўзгартишлар эса рақамли далиллар билан ишлашнинг ҳуқуқий асосларини такомиллаштиришни назарда тутади. Унга кўра, ахборот технологиялари ёрдамида содир этилган жиноятлар бўйича иш учун аҳамиятли бўлган электрон маълумотлар ва ҳужжатларни белгиланган тартибда олиб қўйиш имконияти яратилади.
Қонун лойиҳасида яна бир муҳим янгилик сифатида банк ҳисобварақлари, электрон ҳамёнлар ва криптоактивлар бўйича операцияларни процессуал мажбурлов чораси сифатида вақтинча тўхтатиб туриш тартиби ҳам назарда тутилган. Бу ноқонуний ўзлаштирилган маблағларни бошқа шахсларга ўтказиб юборилишининг олдини олишга хизмат қилиши таъкидланди.
Муҳокамалар якунида қонун лойиҳаси депутатлар томонидан қабул қилиниб, кўриб чиқиш учун Сенатга юборилди.
