Dam olish kunlari O‘zbekiston hududida asosan kam bulutli, yog‘ingarchiliksiz ob-havo kutilmoqda. Faqat ayrim tog‘li hududlarda qisqa muddatli yomg‘ir yog‘ishi, momaqaldiroq bo‘lishi mumkin.
O‘zgidromet xabariga ko‘ra, havo harorati asta-sekin ko‘tarila boshlaydi va yakshanba kuni +36…+39 darajagacha, shimolda, janubda va cho‘l hududlarida +40…+42 darajagacha yetadi.
Respublika shimolida va cho‘l hududlarida shamol tezligi 13−18 metr/soniyagacha kuchayishi, ba’zi joylarda chang to‘zonlar bilan kuzatilishi mumkin.
24 iyul kuni Toshkent, Andijon, Namangan, Farg‘ona viloyatlarida tog‘oldi va tog‘li hududlarda sel-suv toshqin hodisalari yuzaga kelishi mumkin.
Toshkent shahrida havo kam bulutli bo‘ladi, yog‘ingarchilik kutilmaydi. Juma kunduzgi havo harorati +34…+36 daraja, shanba kechasi +21…+23 daraja, kunduzi +35…+37 daraja, yakshanba kuni kechasi +22…+24 daraja, kunduzi +36…+38 daraja bo‘ladi. Shamol sharqdan 3−8 metr/soniya tezlikda esadi.
