Bosh prokuratura huzuridagi departamentning Sirdaryo viloyati boshqarmasi tomonidan o‘tkazilgan tezkor tadbirda Guliston shahar Sanitariya-epidemiologik osoyishtalik va jamoat salomatligi bo‘limi shifokor yordamchisi tayyor ovqat mahsulotiga ijobiy sanitariya xulosasi olib berishni va’da qilib, 300 AQSh dollari va 1,2 million so‘m olgan vaqtida ashyoviy dalillar bilan ushlandi.
Samarqand viloyatining Toyloq tumanida o‘tkazilgan tezkor tadbirda esa tuman sanitariya bo‘limi sanitar vrachi yakka tartibdagi tadbirkorning non ishlab chiqarish tsexi uchun sanitariya-gigiyena xulosasini rasmiylashtirib berish evaziga 9 million so‘m talab qilib, kelishilgan mablag‘ning 400 AQSh dollarini olgan vaqtida qo‘lga olindi. Tekshiruvda uning avval ham 100 AQSh dollari va 500 ming so‘mni firibgarlik yo‘li bilan olgani aniqlangan.
Xorazm viloyatida Urganch shahar sanitariya bo‘limi xodimi umumiy ovqatlanish shoxobchasini ochish uchun ruxsatnoma rasmiylashtirish va olti oy davomida jarima qo‘llanmasligini va’da qilib, fuqarodan 2,4 million so‘m olgan vaqtida ushlandi.
Namangan viloyatida esa shahar sanitariya bo‘limi shifokor yordamchisi fuqaroga nodavlat maktabgacha ta’lim muassasasini ochish uchun ijobiy xulosa olib berish evaziga 1,2 million so‘m olgan vaqtida qo‘lga tushdi. Ma’lum qilinishicha, mazkur shaxs muqaddam sudlangan.
Huquqni muhofaza qiluvchi organlar ma’lumotiga ko‘ra, barcha holatlar yuzasidan Jinoyat kodeksining 25, 168-moddasi (firibgarlik) va 25, 211-moddasi (pora berish) bilan jinoyat ishlari qo‘zg‘atilgan. Ayni paytda ushbu holatlar bo‘yicha tergov harakatlari davom etmoqda.
