Ular o‘z bayonotida ilg‘or SI (frontier AI) rivojlanishini ma’lum ma’noda sekinlashtirishni - yoki hech bo‘lmaganda global darajada muvofiqlashtirilgan boshqaruv harakatlarini tezlashtirishni qo‘llab-quvvatlagan.
«SI ajoyib kelajakni yaratishga yordam berishi mumkin, ammo bunday natija kafolatlanmagan», deyiladi soha olimlari imzolagan bayonotda.
Ularning aytishicha, dunyodagi yetakchi kompaniyalar SI tadqiqotlarini avtomatlashtirish arafasida turgan bo‘lishi mumkin. Bu holat SI taraqqiyotini qanchalik tezlashtirib yuborishini oldindan bashorat qilish qiyin. «Ammo imkoniyatlarning rivojlanishi - olimlar ushbu tizimlarni tushunish yoki nazorat qilish layoqatidan ko‘ra tezroq o‘sib ketishi xavfi bor». Va bu jiddiy xavf.
«Sun’iy intellektning salohiyatini ro‘yobga chiqarish uchun sanoat, hukumat va butun jamiyatga yuzaga kelayotgan xavf-xatarlarni bartaraf etish, xavfsizlik choralarini ishlab chiqish hamda nazoratni kuchaytirish maqsadida qo‘shimcha vaqt yutish imkoniyati kerak bo‘lishi mumkin,» deydi olimlar.
«Ammo har bir kompaniya va mamlakat - bu tezlashuvni bir tomonlama sekinlashtirmaslik bo‘yicha kuchli raqobat bosimi ostida qolmoqda. Bugungi kunda esa dunyoda ilg‘or texnologiyalar taraqqiyotini muvozanatga solish uchun texnik va boshqaruv vositalari yetishmaydi. Ilg‘or modellar chiqarilishini nazorat qilish bo‘yicha boshlangan ishlarga asoslanib: Biz AQSh hukumatidan avtomatlashtirilgan SI rivojlanishini maqsadli nazorat qilib borish uchun zarur texnik va boshqaruv vositalarini ishlab chiqishga qaratilgan xalqaro sa’y-harakatlarni qo‘llab-quvvatlashini so‘raymiz», deyiladi murojaatda.
Ushbu bayonot - o‘tgan haftada sun’iy intellekt sanoatini larzaga keltirgan, katta shov-shuvlarga sabab bo‘lgan kiberxavfsizlik hodisadan so‘ng paydo bo‘ldi.
O‘shanda Open AI'ning hali ommaga taqdim etilmagan modeli o‘zining ichki cheklangan muhitidan chiqib ketgan. U aylanma yo‘llar bilan internetga kirish imkonini qo‘lga kiritdi. Shundan so‘ng u o‘zining raqobatchisi bo‘lgan Hugging Face AI laboratoriyasini buzib kirgan, ya’ni xakerlik hujumi uyushtirgan edi.
