Rossiya Ukraina bo‘ylab yopirilma zarba yo‘lladi

Rossiyalik harbiylar 30 iyulga o‘tar kechasi Ukraina regionlari bo‘ylab yopirilma hujum uyushtirdi, unda 70 dan ortiq raketa va 280 dan ortiq dron ishlatilgan. Kiyev shahri va Kiyev oblasti, Dnipropetrovsk, Lviv, Poltava, Xarkiv, Mikolayiv, Sumi, Vinnitsa, Cherkass va Ivano-Frankovsk oblastlari zarba ostida qoldi, deb xabar berdi Ukraina prezidenti Volodimir Zelenskiy. Hujumlar oqibatida butun mamlakat bo‘ylab sakkiz kishi halok bo‘lgan va o‘nlab kishilar jabrlangan.

• Kiyevda zarba oqibatida bir kishi halok bo‘lib, ikki kishi jabrlangan. Shaharning ikki rayonida yong‘in ro‘y bergan: Obolon rayonida bozor hududidagi savdo pavilyoni yonib ketgan, Svyatoshinsk rayonida garajlar kooperativi hududida yong‘in chiqqan. Hujum vaqtida 56 mingdan ortiq kiyevliklar metro bekatlariga tushib, jon saqlagan.
• Kiyev oblastida besh kishi, jumladan, bir bola Rossiya hujumidan jabrlandi. Brovari rayoni Skibin qishlog‘ida ikki qavatli xususiy uy qisman vayron bo‘lgan, unga qo‘shni joylashgan yana ikki uy ham shikastlangan.
• Dnipropetrovsk oblasti Radushnoye qishlog‘ida olti kishi, jumladan ikki bola halok bo‘lgan, sakkiz kishi jarohat olgan. Mahalliy rasmiylarga ko‘ra, Rossiya raketasi ko‘p farzandli oila istiqomat qilgan xususiy uyga kelib urilgan. Qutqaruvchilarga ko‘ra, bu yerda ikkita xususiy uy vayron bo‘lib, yana beshtasi shikastlangan. Xarobalar ostidan ikki bola chiqarib olingan, yana besh kishi ichkarida qolib ketgan bo‘lishi mumkin. Qidiruv-qutqaruv ishlari davom ettirilmoqda. Radushnoyega yaqin joylashgan Kriviy Rih shahrida 31 iyul qurbonlar xotirasi uchun motam kuni deb e’lon qilindi.
• Lvivda esa 34 kishi jarohat olgan, bu yerda tungi raketa hujumi vaqtida bir necha uy qisman vayron bo‘lgan. Besh qavatli bino xarobalar ostida odamlar qolib ketgan bo‘lishi mumkin. Shahar meri Andrey Sadoviy xabar berishicha, Rossiya raketasi Vigovskiy ko‘chasidagi uylardan biriga kelib urilgan, ammo portlamagan. Raketaning jangovar qismi zararsizlantirilgan. Livvda hujum oqibatida jami 20 dan ortiq uy, bolalar bog‘chasi va maktab binosi shikastlangan.
• Poltava oblastida bir kishi halok bo‘lgan. Rossiya zarbasidan keyin mahalliy korxonalardan birining omborlari, shuningdek, «Novaya pochta» terminali vayron bo‘lgan.

RF Mudofaa vazirligi Rossiya harbiylari Kiyev, Lviv, Dnipropetrovsk oblasti va Ukrainaning boshqa hududlaridagi harbiy aerodromlar, harbiy korxonalar va logistika markazlariga zarbalar berganini ma’lum qildi. Bundan tashqari, vazirlik Odessada va Janubiy portda go‘yoki «harbiy mol-mulk» yetkazib berayotgan yuk kemalari hujumlar nishoni bo‘lganini ta’kidlagan.

Yangi yopirilma zarba fonida Zelenskiy g‘arblik hamkorlarni Ukrainani himoya qilish uchun yetishmayotgan havo mudofaa tizimlari uchun raketalar yetkazib berishni kechiktirmaslikka chaqirdi. Uning so‘zlariga ko‘ra, o‘tgan tunda Ukraina aviatsiyasi Rossiya raketalarining katta qismini urib tushirdi va «hatto mobil o‘t ochish guruhlari ham qanotli raketalarga qarshi samarali ishlay oldi».

«Hamkorlardan havo mudofaa tizimlari uchun raketalar tanqis bo‘lgan sharoitda, harbiylarimiz deyarli imkonsiz ishlarni amalga oshirmoqda <...>. Bu havo hujumidan mudofaa tizimlari uchun raketalar yetkazib berilmaganda yoki kechikkanda odamlarning hayotini saqlab qoladigan noyob mahoratdir. <...> Barcha hamkorlar qanday va nima bilan yordam bera olishlarini bilishadi. O‘z vaqtida yordam bermaslik, ballistik raketalarga qarshi raketalarni yetkazib berishni kechiktirish aynan shunday vayronagarchiliklarga, afsuski, bugungi kunda mavjud bo‘lgan qurbonlarga olib keladi», – deya qo‘shimcha qildi Zelenskiy.

Ukrainaning Wildberries bo‘ylab yangi zarbalari: yana uchta ombor yondi

Ukraina dronlari 30 iyul tongida Wildberries marketpleysining yana uchta logistik markazlariga hujum uyushtirdi. Kompaniyadagilar Penza yaqinidagi hamda Udmurtiyaning Sarapul shahridagi omborlar zarba ostida qolganini tasdiqlagan. Bu omborlarda yong‘in chiqqan. Penzadagi omborga hujum oqibatida bir kishi jarohat olgan.

Bundan tashqari, ukrain dronlari Wildberries’ning Perm o‘lkasidagi omboriga zarba bergan. Bu haqda dastlab Ukrainadagi telegram-kanallar zarbadan keyin yong‘in boshlangani aks etgan foto va videolarga tayanib xabar berdi. Keyinroq Rossiyadagi «Agenstvo» va Astra nashrlari Perm rayonining Zamulyanka qishlog‘ida joylashgan logistik markazi hujumga uchraganini ma’lum qildi. Kompaniya va mahalliy rasmiylar hozircha hujum yuzasidan izoh bermagan.

18 iyuldan buyon Ukraina zarba bergan Wildberries omborlari soni 14 tani tashkil etmoqda. Kiyevdagilar bu hujumlarni ushbu omborlarda dronlar uchun ehtiyot qismlar hamda ikki maqsadli mahsulotlar saqlanishi bilan izohlaydi.