Qonunga ko‘ra, qoramol, qo‘y, echki va tuyalar tug‘ilganidan 14 kun o‘tgach, otlar 4 oydan keyin, cho‘chqalar 1 oydan keyin, itlar va mushuklar esa 3 oydan keyin identifikatsiya qilinishi belgilangan. Bunda hayvonlar mazkur muddatlar tugaganidan so‘ng bir oydan kechiktirmay ro‘yxatdan o‘tkazilishi shart.
Shuningdek, saqlash yoki ko‘paytirish maqsadida O‘zbekistonga olib kirilgan hayvonlar mamlakatga kiritilgan sanadan e’tiboran 21 kun ichida identifikatsiya qilinishi kerak.
Qonunda hayvon so‘yilganda, nobud bo‘lganda, o‘lganda, yo‘q qilinganda yoki mamlakat tashqarisiga olib chiqilganda, u yetti kun ichida davlat hisobidan chiqarilishi ham nazarda tutilgan.
Hayvon egasining murojaati asosida vakolatli davlat organi vakili besh ish kuni ichida hayvonni identifikatsiya qilishi va davlat ro‘yxatidan o‘tkazishi lozim. Qonun hayvonlar hisobi va ularning harakatini yagona tizim orqali kuzatishni ta’minlashga qaratilgan.
