Samarqandda yuk mashinasida yong‘in chiqib, ag‘darilishi oqibatida haydovchisi halok bo‘ldi. Bu haqda viloyat YHXB matbuot xizmati xabar berdi.
Ma’lum qilinishicha, hodisa 6-avgust kuni soat 16:00 larda Nurobod tumani Mehnatkash mahallasi hududidan o‘tuvchi A-378 avtomobil yo‘lining 35-kilometrida, Samarqand-Qashqadaryo yo‘nalishida sodir bo‘lgan.
Dastlabki ma’lumotlarga ko‘ra, harakatdagi MAN rusumli yuk avtomobili kabinasining salon qismida to‘satdan yong‘in chiqqan.
Haydovchi transport vositasini to‘xtatishga uringan vaqtda boshqaruvni yo‘qotgan. Oqibatda yuk avtomobili yo‘lning chap tomonidagi beton to‘siqqa urilib, ag‘darilgan.
Yo‘l-transport hodisasi oqibatida haydovchi turli darajadagi og‘ir tan jarohatlari olib, voqea joyida vafot etgan.
Hozirda mazkur holat yuzasidan Nurobod tumani IIB TB tomonidan jinoyat ishi qo‘zg‘atilib, tergov harakatlari olib borilmoqda.
