Bugun, 11-avgust kuni jinoyat ishlari bo‘yicha Shayxontohur tuman sudining yopiq sud majlisi yakunida Aziz Hakimovga (1975-yilda tug‘ilgan, ma’lumoti – oliy, muqaddam sudlanmagan, vaqtincha ishsiz) doir jinoyat ishi yuzasidan sud hukmi o‘qildi. Bu haqda Toshkent shahar sudlari xabar berdi.
Sudlanuvchining harakatlarida Jinoyat kodeksining 150-moddasida (urushni targ‘ib qilish) nazarda tutilgan jinoyat tarkibi bo‘lmagani sababli Jinoyat-protsessual kodeksining 83-moddasi (reabilitatsiya uchun asoslar) 2-bandiga asosan oqlandi.
Shu bilan birga, Aziz Hakimov Jinoyat kodeksi 139-moddasining 2-qismida (tuhmat), 140-moddasining 2-qismida (haqorat qilish) hamda 156-moddasining 2-qismida (milliy, irqiy, etnik yoki diniy adovat qo‘zg‘atish) nazarda tutilgan jinoyatlarni sodir etishda aybdor deb topildi.
Jinoyat kodeksining 59,61-moddalari tartibida tayinlangan jazolarni qisman qo‘shish yo‘li bilan o‘tash uchun uzil-kesil 4 (to‘rt) yil, 2 (ikki) oy muddatga ozodlikdan mahrum qilish jazosi tayinlandi.
Shuningdek, sud hukmi bilan Raqamli texnologiyalar vazirligiga sudlanuvchi tomonidan yuritilgan «Telegram» messenjeridagi «Comrade_Aziz» kanalini bloklash majburiyati yuklatildi.
Bundan tashqari:
ish bo‘yicha 6 (olti) nafar jabrlanuvchiga o‘zlariga yetkazilgan moddiy va ma’naviy zararlarni undirish yuzasidan fuqarolik ishlari bo‘yicha sudga murojaat etish;
sudlanuvchiga hukmga nisbatan yuqori sud instansiyasiga shikoyat berish muddati va tartiblari tushuntirildi.
Aziz Hakimov ijtimoiy tarmoqlardagi sahifalarida O‘zbekiston Respublikasi suverenitetiga qarshi chiqishlar va sovet davri targ‘iboti bilan shug‘ullangan. Shuningdek, uning 1930-yillardagi siyosiy qatag‘on qurbonlari hamda 1920-yillardagi milliy-ozodlik kurashi ishtirokchilari xotirasini qoralagan chiqishlari ham tarmoqlarda jiddiy bahslar va noroziliklarni yuzaga keltirgan. U Toshkent shahrida «O‘lmas polk» tadbirlarini tashkil etishda ham faol ishtirok etgan.
2025-yil avgustida Aziz Hakimov O‘zbekiston jurnalistika va ommaviy kommunikatsiyalar universiteti rektori, jurnalist Sherzodxon Qudratxo‘jani kamsitgani uchun jarimaga tortilgan, unga bazaviy hisoblash miqdorining 50 baravari – 18 million 750 ming so‘m miqdorida jarima belgilangandi.
Undan jabrlanganlardan yana biri, bloger Nikita Makarenko Aziz Hakimovni SSSRni ulug‘lovchi va O‘zbekiston mustaqilligi qadrini poymol qiluvchi materiallar e’lon qilishda ayblagandi.
«Ukrainadagi urushni targ‘ib qiluvchi hamda fuqarolarimizni xorijiy qurolli kuchlarga yollashga da’vat etuvchi materiallarni faol e’lon qilib kelmoqda. Umid qilamanki, mutasaddi idoralar ushbu huquqbuzarliklar yuzasidan ham tegishli ishlarni qo‘zg‘atadi», deb yozgandi Makarenko.
Keyinroq, 2025-yil sentyabr oyida u hibsga olingan va bir necha modda bo‘yicha ayblov e’lon qilingandi.
Sudlanuvchining himoyachisi Sergey Mayorovning ma’lum qilishicha, Hakimov apellyatsiya bermaydi. Qayd etilishicha, tergov hibsxonasida o‘tkazilgan davr hisobga olinsa, Hakimov yana uch yildan ko‘proq muddatni manzil-koloniyada o‘taydi.
