16-avgust, yakshanba kuni Kiyevda Mixail Fedorovni Ukraina mudofaa vaziri lavozimiga tiklashni talab qilgan ommaviy aksiyalar davom etdi. Ukraina OAV ma’lumotlariga ko‘ra, bu kabi namoyishlar ketma-ket 32 kundan beri o‘tkazilmoqda.
«Interfaks-Ukraina» agentligi tadbirni «mudofaa sohasida muloqot va islohotlarni qo‘llab-quvvatlash aksiyasi» deb atagan.
Namoyishchilar Kiyev markazida joylashgan Ukraina xalqi Ozodlik arkasi oldida to‘plangan. Shundan so‘ng ular Xreshchatik, Osmon yuzligi qahramonlari xiyoboni va Olginskaya ko‘chasi bo‘ylab yurish o‘tkazgan.
Aksiya yakunida prezident ofisi binosi yaqinidagi Ivan Franko maydonida miting tashkil etilgan. Oboz.ua nashriga ko‘ra, namoyishchilar kolonnasi poytaxtning markaziy ko‘chalari bo‘ylab yuzlab metrga cho‘zilgan.
Namoyishchilar nimani talab qilmoqda?
Jurnalistlarning qayd etishicha, aksiyada turli yoshdagi fuqarolar ishtirok etgan, ammo ular orasida yoshlar ko‘pchilikni tashkil qilgan.
Namoyishchilarning asosiy talabi - Mixail Fedorovni Ukraina mudofaa vaziri lavozimiga qaytarish.
Shu bilan birga, aksiya ishtirokchilari prezident Volodimir Zelenskiyning boshqa so‘nggi kadrlar bo‘yicha qarorlariga ham norozilik bildirgan.
Xususan, ular sobiq mudofaa vaziri Rustem Umerovning Ukraina Tashqi razvedka xizmati rahbari etib tayinlanishi hamda Mikolayiv viloyati harbiy ma’muriyatining sobiq rahbari Vitaliy Kimning Ukraina faxriylar ishlari vaziri lavozimiga tayinlanishini tanqid qilgan.
Namoyishlarda Fedorovni qo‘llab-quvvatlovchi, hukumatni jamiyat bilan ochiq muloqot qilishga va mamlakatning Yevropa yo‘nalishini davom ettirishga chaqiruvchi shiorlar yangragan.
Namoyishlar boshqa shaharlarda ham o‘tkazildi
Ukrainaning NV nashri ma’lumotlariga ko‘ra, shunga o‘xshash aksiyalar faqat Kiyev bilan cheklanmagan.
Fedorovni qo‘llab-quvvatlash namoyishlari Lviv, Dnipro, Lutsk, Rovno, Poltava, Odessa, Vinnitsa, Xmelnitskiy va Chernovsi shaharlarida ham o‘tkazilgan.
Kiyevda esa aksiya ishtirokchilari prezident ofisi vakiliga Volodimir Zelenskiy nomiga tayyorlangan petitsiyani topshirgan.
Ukraina OAV ma’lumotlariga ko‘ra, hujjatda Mixail Fedorov mudofaa vaziri bo‘lgan davrda boshlangan islohotlarni davom ettirish hamda mamlakat rahbariyatini jamiyat bilan kengroq muloqot o‘rnatishga chaqirish talablari o‘rin olgan.
«Ukrainskaya pravda» xabar berishicha, namoyish tashabbuskorlaridan biri, urush faxriysi Dmitriy Kozyatinskiy aksiyada so‘zga chiqib, Ukrainada hanuz mudofaa va tashqi ishlar vazirlari tayinlanmaganiga e’tibor qaratgan.
