Moldova politsiyasi 17-avgust kuni mamlakat janubi-sharqida uchuvchisiz uchish apparati havo hududini buzib kirgani va qishloq xo‘jaligi yeriga qulab tushganini ma’lum qildi.
Dron Rossiyaga tegishli bo‘lishi mumkinligi taxmin qilinmoqda. Dron qulaganidan keyin dalada kichik yong‘in boshlangan. Hodisa oqibatida hech kim jabrlanmagan.
Avvalroq Ukraina Qurolli kuchlari Havo kuchlari Odessa porti tomon harakatlanayotgan Rossiyaning «Banderol» turidagi droni belgilangan yo‘nalishdan adashib, davlat chegarasini kesib o‘tgani va Moldova hududiga kirib qolganini bildirgan edi.
Avgust oyi boshidan beri Moldova havo hududi dronlar tomonidan bir necha marta buzilgan. Manbaga ko‘ra, ular orasida Shahed turidagi Rossiya dronlari ham bo‘lgan. Avvalgi dronlardan biri ham Moldova hududiga qulab tushgan.
Sandu dronlarning hammasi ham tasodifan kirmayotganini aytdi
Moldova prezidenti Mayya Sandu mamlakat havo hududining dronlar tomonidan buzilishiga munosabat bildirdi.
Uning aytishicha, dronlarning faqat bir qismi Moldova hududiga tasodifan kirib qolmoqda. Ayrim dronlar esa mamlakat rasmiylarining bunday tahdidlarga javob berish imkoniyatlarini sinab ko‘rish maqsadida ataylab yuborilayotgan bo‘lishi mumkin.
Sandu Rossiyaning Kishinyovdagi elchixonasi rahbari Oleg Ozerovni mamlakatdan chiqarib yuborish ehtimoli ham bunday dron parvozlarini to‘xtatmasligini ta’kidlagan.
Uning fikricha, Rossiyaga norozilik notalari yuborilishi ham Moskva siyosatini o‘zgartirmaydi.
Moldova prezidenti dronlar bilan bog‘liq tahdidni bartaraf etishning eng muhim yo‘li Ukrainaga yordam berish ekanini ta’kidladi.
U Ukraina ushbu urushda g‘alaba qozonishiga erishish Moldova, Ukraina va boshqa hududlarda bunday dronlar parvozini to‘xtatish uchun muhimligini aytgan.
Bir kun avval Ruminiyada dron urib tushirilgan
Moldovadagi hodisadan bir kun avval NATO missiyasi doirasida harakatlanayotgan Ispaniya qiruvchi samolyoti Ruminiya osmonida uchuvchisiz uchish apparatini urib tushirgan.
Ruminiya Mudofaa vazirligi ma’lumotiga ko‘ra, dron mamlakat havo hududiga Moldova tomonidan kirib kelgan va keyin yo‘q qilingan.
Biroq vazirlik bu Rossiya yoki Ukrainaga tegishli dron bo‘lganiga aniqlik kiritmagan.
Bu 2026-yil boshidan beri Ruminiya osmonida urib tushirilgan to‘rtinchi dron bo‘lgan.
Iyul oyida Ruminiyaning F-16 qiruvchi samolyotlari ilk bor Rossiyaga tegishli dronlarni urib tushirgan edi. Ushbu dronlar Ukrainaga amalga oshirilgan hujum vaqtida Ruminiya havo hududiga kirib qolgan.
Bundan tashqari, yil boshida Ukrainaga hujum vaqtida Rossiyaga tegishli dron Ruminiyaning Galats shahridagi turar joy binosiga qulab tushgan. O‘sha hodisa oqibatida ikki kishi jarohatlangan.
